රුපියල් මිලියන 467 ක වියදමකින් ඉදිකරන ලද මෙම සිව් මහල් ගොඩනැඟිල්ල තුළ දිස්‌ත්‍රික්‌ ලේකම් කාර්යාලය යටතේ පවතින සියලුම අංශ ස්‌ථාපිත කර තිබේ.

මේ අතර, මඩුල්ල බහුකාර්ය වෙළෙඳ මධ්‍යස්ථානය ජනතා අයිතියට පත් කිරීමේ අවස්ථාවට ඊයේ (31) එක්වෙමින්,  ජනාධිපති මහින්ද රාජපක්ෂ මහතා ප්‍රකාශ කර සිටියේ,  ඌව පළාත් සභා මැතිවරණයෙන් එක්සත් ජනතා නිදහස් සන්ධානයට ලබා දෙන අතිවිශිෂ්ට ජයග්‍රහණයත් සමඟින් රට සංවර්ධනය කරා ගෙන යන ආණ්ඩුවේ ගමන ශක්තිමත් කරන්නට ඵෙතිහාසික ඌවේ ජනතාව කටයුතු කරනු නිසැක බවයි. 

යුද්ධය නිමා කළ රට සංවර්ධනය කරමින් යන ගමන ඉදිරියටම ගෙන යන්නට ඌව පළාත් සභා මැතිවරණයෙන් ලැබෙන අතිවිශිෂ්ට ජයග්‍රහණයත් සමඟින් ඵෙතිහාසික ඌවේ ජනතාව පළාත් සභා මැතිවරණයෙන් එක්සත් ජනතා නිදහස් සන්ධානයට අතිවිශිෂ්ට ජයග්‍රහණයක් හිමි කර දිය යුතු බව ජනාධිපති මහින්ද රාජපක්ෂ මහතා එහිදී පැවසීය. 

මේ ගමන ඉදිරියට යන්නට ප්‍රාදේශීය සභාව, පළාත් සභාව ආණ්ඩුව සමඟ සිටිය යුතු බව පැවසූ ජනාධිපතිවරයා එදා දිළිඳු හා දුෂ්කර දිස්ත්‍රික්කයක් වූ මොනරාගල දිස්ත්‍රික්කය අද සංවර්ධනය වී ඇත්තේ එම ආයතන ආණ්ඩුව සමඟ සහයෝගයෙන් කටයුතු කළ නිසා බවත් පෙන්වා දුන්නේය.

රටේ ප්‍රදේශ කිහිපයකට බලපා ඇති නියඟයට විසැඳුම් දීමට මේ වන විටත් පියවර ගෙන තිබෙන බව පැවසූ ජනාධිපතිවරයා සෑම නිවසකටම පිරිසිදු පානීය ජලය ලබා දීමේ වැඩපිළිවෙළ ලබන වසරේ සිට ආරම්භ කරන බව ප්‍රකාශ කළේය.

එසේ සෑම නිවසකටම පිරිසිදු පානීය ජලය ලබා දීමෙන් අපට නියඟය පරාජය කළ හැකි බවත් සෑම නිවසකටම විදුලිය ලබා දුන්නා සේම පානීය ජලය ලබා දීමේ ඉලක්කයත් ජයග්‍රහණය කරන බවත් ජනාධිපතිවරයා කීවේය.

මාලදිවයින වැනි රටවල ජනතාව පානය කරන්නේ පිරිසිදු කර ගත් මුහුදු ජලය බවත් අපේ රටේත් මුහුදු ජලය පිරිසිදු කර ජනතාවට ලබා දීමට කටයුතු කරන ලෙස තමා ආර්ථික සංවර්ධන ඇමැතිවරයාට හා මුදල් අමාත්‍යාංශ ලේකම්වරයාට උපදෙස් දී ඇති බවත් ජනාධිපතිවරයා පැවසීය.

 අද රට සංවර්ධනය කරා රැගෙන යන්නට හැකියාව ලැබී ඇත්තේ යුද්ධය නිමා කළ නිසා බව පෙන්වා දුන් ජනාධිපතිවරයා එහෙත් සමහරුන්ට නම් රටේ යුද්ධයක් තිබුණා ද කියාවත් මතක නොමැති බව ප්‍රකාශ කළේය.