ශ්‍රී ලංකා මුස්ලිම් කොන්ග්‍රසය මේ දක්වා එළඹෙන ජනාධිපතිවරණේදී එම පක්ෂයේ සහයෝගය ලබා දෙන්නේ කවර අපේක්ෂකයකුටදැයි නිල වශයෙන් ප්‍රකාශයට පත් කර නොමැත. එහෙත් එම පක්ෂයේ උත්තරීතර මණ්ඩලය පසුගියදා තීරණය කළේ මෛත්‍රීපාල සිරිසේන මහතාට සහයෝගය ලබා දිය යුතු බවය. එමෙන්ම ඒ පක්ෂ නායකයාට අවසන් තීරණය ගැනීමේ බලයද පවරණු ලැබ තිබේ.
කෙසේ නමුත් හකීම් මහතා තම තීරණය දැනුම් දීම දිගින් දිගටම අතපසු කරමින් සිටී. ආණ්ඩුවෙන් ඉවත් වීම සඳහා කොතෙකුත් සාධාරණ කරුණු තිබුණද ඔහු එම තීරණය නොගන්නේ කවර හේතුවක් මතද යන්න ගැන මුස්ලිම් ප්‍රජාවේ ගැටලුවක් බවටද පත්ව තිබේ. නමුත් මුස්ලිම් ජන කොටස් අතර පවතින්නේ නායකයන් කවර තීරණයක් ගත්තත් පවතින රජය පෙරළා දැමීමට තමන් තීරණය කර ඇති බවට වන මතයකි.
