මැතිවරණ ප්‍රචාරක ව්‍යාපාරයට සහභාගි නොවන මෙන් මැතිවරණ කොමසාරිස්වරයා නියෝග කොට තිබියදීත් බොහෝ රාජ්‍ය නිලධාරීන් එය නොතකා හැර තිබෙන බව කැෆේ මැතිවරණ නිරීක්ෂණ මධ්‍යස්ථානයේ විධායක අධ්‍යක්ෂ රජිත් කීර්ති තෙන්නකෝන් පැවසීය.
මනූෂ නානායක්කාර මන්ත්‍රීවරයා විසින් අද සඳුදා ගාල්ලේ සංවිධානය කොට තිබෙන 'මහින්ද චින්තන - ලොව දිනන මඟ 2020 ගාල්ල' මැයෙන් යුත් රැස්වීමට ආරක්ෂක ලේකම් ගෝඨාභය රාජපක්ෂ සහ මුදල් අමාත්‍යංශයේ ලේකම් පීබී ජයසුන්දර සහභාගි වීම පැහැදිලිවම මැතිවරණ නීතිය උල්ලංඝනය කිරීමක් බවත් රජිත් කීර්ති තෙන්නකෝන් සඳහන් කළේය.
මහින්ද රාජපක්ෂ පාලනය රැකගැනීම සඳහා වැඩිම වෙහෙසක් ගන්නා ඇමැති විමල් වීරවංශට අනුව මුදල් අමාත්‍යංශ ලේකම් පීබී ජයසුන්දර මහතා මේ රටේ අංක එකේ ආර්ථික ඝාතකයාය. ඔහුව එම තනතුරෙන් පහ කිරීම සඳහාද වීරවංශ දැඩි ක්‍රියාකාලාපයන් අනුගමනය කරනුද පසුගිය කාලයේ දකින්නට ලැබිණි. එහෙත් අද මේ ආර්ථික ඝාතකයාද වීරවංශ මෙන්ම මෙම මහින්ද රාජපක්ෂ පාලනය රැකීම වෙනුවෙන් රටේ නීති රීතිද උල්ලංඝනය කරමින් සහභාගී වී සිටී.
- බීබීසී සංදේශය ඇසුරෙනි
