"මේ ගැටලුව විසදමින් එම වැටුප් විෂමතාව ඉවත් කිරීමට මම කැබිනට්‌ මණ්‌ඩලයෙන් මේ වන විට ඉල්ලීමක්‌ කර අවසන්. සාමාන්‍යයෙන් එවැනි කැබිනට්‌ පත්‍රිකාවක්‌ සඳහා සති දෙකක කාලයක්‌ තුළ තීරණය ලැබෙනවා. ඒ අනුව මට ලොකු විශ්වාසයක්‌ තිබෙනවා මේ බදාදා දිනය වන විට මේ සඳහා කැබිනට්‌ මණ්ඩල අනුමැතිය ලැබෙයි කියලා. වසර ගණනාවක්‌ තිස්‌සේ කිසිවෙකුටත් විසදුම් ලබාදිය නොහැකි වූ ක්‍රීඩා නිලධාරීන්ගේ වැටුප් ප්‍රශ්නය ඒ අනුව තව නොබෝ දිනකින්ම විසඳන්න අපිට හැකියාව ලැබෙයි කියලා දැඩි විශ්වාසයකින් පසුවෙනවා " යෑයි ක්‍රීඩා අමාත්‍යවරයා පවසන ලදී.
2006 වසරේ අය වැයට අනුව රජයේ සේවක වැටුප් වැඩි වීම සඳහා වූ 6/2006 චක්‍රලේඛයට ක්‍රීඩා නිලධාරීන්ගේ වැටුප් වැඩි කිරීම මග හැරී යාම හේතුවෙන් ඔවුන් මේ වන විට අවම වැටුපක්‌ ලබන රාජ්‍ය සේවක කොට්‌ඨාසයක්‌ බවට පත්ව සිටින අතර ඉකුත් වසර කිහිපය තිස්‌සේ මෙම වැටුප් විෂමතාව මග හරවා ගැනීම සඳහා ක්‍රීඩා නිලධාරීහු දැඩි වෙහෙසක නිරත වූහ.
එයට විසඳුමක්‌ නොලැබීම හේතුවෙන් සිය කටයුතු වලින් ඉවත් වී වෘත්තීය ක්‍රියාමාර්ගයකට අවතීර්ණ වීමට ක්‍රීඩා නිලධාරීන් කටයුතු කළ අතර එම තත්වය මත මේ වන විට වසර 40 ක ඉතිහාසයේ පළමු වරට ජාතික ක්‍රීඩා උළෙල පැවැත්වීමට නොහැකි වන තත්වයක්‌ ද උද්ගතව තිබේ.
දිවයින
