මේ ගීතය අඩංගු "දැන් මතකද" චිත්‍රපටයේ වත්මන් අයිතිකරු වන තිස්ස නාගොඩවිතාන මහතා "හිස් ටින් එකක්" ගීතය දෙරණ නාළිකාවට ඊයේ පැවරුවේය.
"හිස් ටින් එකක්" ගීතය ධනුෂ්ක ගායනා කිරීම නිසා ජනප්‍රියත්වයට පත්වුණා. ඒ නිසා ඒ ගීතය තවදුරටත් ජනප්‍රිය කරවීමේ අරමුණින් එම ගීතය "දෙරණ"ට භාර දුන්නා" යැයි තිස්ස නාගොඩවිතාන මහතා පැවැසුවේය.
1970 මාර්තු 13 වැනි දින රිදී තිරයට පැමිණි "දැන් මතකද?" චිත්‍රපටය එදා නිෂ්පාදනය, අධ්‍යක්‍ෂණය කෙළේ නීල් රූපසිංහය. මේ ගීතයට රඟපෑමෙන් එක් වූයේ සේනාධීර රූපසිංහ, ඇන්තනි සී. පෙරේරා සහ බන්දු මුණසිංහ නළුවන්ය.
අල්හාජ් මොහිදින් බෙග්, එච්.ආර්. ජෝතිපාල, මිල්ටන් පෙරේරා "හිස් ටින් එකක්" ගීතය ගායනා කළ අතර සංගීතඥ පී.එල්.ඒ. සෝමපාල සංගීතවත් කෙළේය. ගීතය රචනා කෙළේ සිරිල් ඒ. සීලවිමල සූරීන්ය.
හිස් ටින් එකක් වාගෙයි අපේ මේ ජීවිතේ මල්ලි
කිසි වාසියක් නෑ හාමතෙයි නැත්තම් අතේ සල්ලි //
කාටවත් බය නෑ අපි තිබුණත් නැතත් සල්ලි
ඕ... තිබුණත් නැතත් සල්ලි
අපි කයිවාරු නෑ මල්ලි
ඒ වුණත්
හිස් ටින් එකක් වාගෙයි අපේ මේ ජීවිතේ මල්ලි
කිසි වාසියක් නෑ හාමතෙයි නැත්තම් අතේ සල්ලි
අපේ පාටිය පිරිමි පාටියයි
අපි ඡන්දෙ දෙන්නේ වාසියටයි
කොයි කාගෙ ආණ්ඩුවත් අපට එකයි
අපට ඕනෑ ප්‍රජාතත්ත්‍රවාදයයි
ඒ වුණත්
හිස් ටින් එකක් වාගෙයි අපේ මේ ජීවිතේ මල්ලි
කිසි වාසියක් නෑ හාමතෙයි නැත්තම් අතේ සල්ලි
නැති බැරි එකා තල්ලු වෙනවා
පුළුවන් මිනිහා හිනහා වෙනවා
වැටි වැටි වුණත් නැගිටිනවා
මගේ බලෙත් මං පෙන්නනවා
ඇත්ත නේන්නම්...
හිස් ටින් එකක් වාගෙයි අපේ මේ ජීවිතේ මල්ලි
කිසි වාසියක් නෑ හාමතෙයි නැත්තම් අතේ සල්ලි
කිසි වාසියක් නෑ හාං...
කිසි වාසියක් නෑ හාමතෙයි නැත්තම් අතේ සල්ලි
හිස් ටින් එකක් වාගෙයි අපේ මේ ජීවිතේ මල්ලි
ගායනය - එච්.ආර්. ජෝතිපාල, ජේ.ඒ. මිල්ටන් පෙරේරා, මොහිදීන් බෙග්
සංගීතය - පී.එල්.ඒ. සෝමපාල
ගී පද - සිරිල් ඒ. සීලවිමල
