මෙක්සිකෝවේ අධි ආරක්ෂිත බන්ධනාගාරයෙන් උමඟක් හාරාගෙන එරට ප‍්‍රධානතම මත්ද්‍රව්‍ය ජාවාරම්කරු ජෝකින් ගුස්මාන් පලා යනවා. මේවනවිට ඔහුව අත්අඩංගුවට ගැනීම සඳහා මෙක්සිකෝ රජය ඩොලර් 38 ලක්ෂයක ත්‍යාගයක් දෙන්න ලෑස්තියි. ඔහු ඉතා පහසුවෙන් පැනගිය ආකාරය බන්ධනාගාරයේ සවිකර තිබූ රහස් කැමරාවක සටහන් වී තිබෙනවා.
බන්ධනාගාර මැදිරියේ සිට කිලෝමීටර් එක හමාරක් දිග උමඟක් කැනීමෙන්, පසුගිය සෙනසුරාදා ඔහු නැවතත් බන්ධනාගාරයෙන් පළා ගියේ දෙවන වතාවටයි.
මීට පෙර 2001 වසරේදී ගුස්මාන් පැනගොස් තිබෙන්නේ රෙදි රැගෙන යන කරත්තයක සැඟවී ගෙනයි. ඔහු නැවත අල්ලා ගැනීමට වසර 13ක් ගතවී තිබෙනවා.
ගුස්මාන්ගේ පැනයාමට බන්ධනාගාර පාලකයින් සහාය වී ඇති බව පැවසෙනවා.
ජෝකින් ගුස්මාන් පැනයාම සඳහා නිර්මාණය කර ඇති උමඟ විදුලි ආලෝකය, වාතාශ්‍රය ලැබෙන උපකරණ වගේම උමඟ කණින උපකරණ සහ පස් ගෙනයාමය පහසු වෙන සේ නිර්මාණය කළ යතුරු පැදියකින් සමන්විතයි. සැතපුමක් පමණ දිගින් යුතු වෙන මේ උමඟ ගුස්මාන් රැඳී සිටි සිර කුටියේ නාන කරාමය අසලින් අවසන් වී තිබෙනවා.
