මේ රටේ බහුතර ජනතාවක් විසින් රටේ පාලකයා විය යුතු බවට තීන්දු තීරණයක් ගෙන ජනාධිපතිවරයා ලෙස ගෝඨාභය රාජපක්ෂ මහතාත් පොදු ජන පෙරමුණ ප්‍රමුඛ එම සන්ධානය බලයට පත් කළේ ගෝඨාභය රාජපක්ෂ මහතා ඉදිරිපත් කළ රට සංවර්ධනය කරන වැඩ පිළිවෙල වූ 'සෞභාග්‍යයේ දැක්ම' වැඩ පිළිවෙල ගැන ඉමහත් බලාපොරොත්තු තබාගෙනය. එහෙත් අවාසනාවකට ගෝලීය වසංගතයක් බවට පත් වී ගෝලීය අර්බුධයක් බවට පත් වූ කොරෝනා වෛරසයෙන් මෙරටටද බේරී සිටීමට හැකි වූයේ නැත. එහි අහිතකර ප්‍රතිපල සියල්ලම පාහේ අපටද භුක්ති විඳීමට සිදු විය.
එහෙත් රටේ හැකියාවන් සම්පත් සහ රටට දුන් දේශපාලන නායකත්වයත් නිසා සිදු වීමට නියමිතව තිබූ ව්‍යවසනකාරී තත්වයන් බොහොමයකින්ම ගැලවීමටද අපට හැකි විය. ලෝකයෙ සෙසු රටවල් හා සැසඳිමේදී ශ්‍රී ලංකාව වඩාත් සාර්ථක ලෙස මෙම වසංගත ප්‍රහාරය මර්දනය කර විය හැකිව තිබූ බරපතල හානි වලින් ගැලවීමට වාසනාවන්ත විය. කෙසේ නමුත් මේ වසංගතයට එරෙහි සටන නිසා රටේ සංවර්ධන ගමන දෙවසරක් තිස්සෙ අඩ පණ විය. බලාපොරොත්තු වූ ලෙස සෞභාග්‍යයේ දැක්ම ක්‍රියාවට නැංවීමට බාධා එල්ල විය. එහෙත් ඒ යටපත් වෙන්න ඉඩ නොදී හැකි පමණින් දැඩි වෙහෙසකින් ඉදිරියට ඇදගෙන යාමටද හැකියාවක් ලැබිණි. රටේ මහජනතාව යම් පීඩනයකට අසු වූවද ඒ බරපතල නොවීය. ජනතාව මත එලල් වන පීඩාවන් අවම කිරීම වෙනුවෙන් අවදානම් සහගත අසීරු ආර්ථිකමය තීන්දු තීරණ ගෙන අතිශය වගකීම් සහගත ලෙස රජය කටයුතු කළ බව දැන් මේ මොහොතේ දී හෝ විරුද්ධ පාක්ෂිකයන් පිළිගැනීම නොකරන්නේ නම් ඒ තනිකර කුහක කමකි.
කෙසේ නමුත් වසර දෙකක් තිස්සෙ ගෙවුණු වඩාත් දුෂ්කර සමය දැන් අවසන් කඩ ඉමෙහි පවතී. රටේ අභිවෘද්ධිය වෙනුවෙන් වන සංවර්ධන ගමන ඊට හිමි ජවයෙන් ඉදිරියට යෑම දැන් ආරම්භ කළ යුතුව තිබේ. එහෙත් එය පහසු නැත. වසර දෙකක් තිස්සේ වූ හානිදායක තත්වයන් නිසා පෙරට වඩා වෙහෙසක් දැරිය යුතුව ඇත. ආණ්ඩුවට මෙය තනියෙන් කරගෙන යෑමට වුව යම් තරමක හෝ හැකියාවක් තිබුණද බලාපොරොත්තු වන ඉලක්කයන් කරා නිශ්චිතව රට ගෙන යෑමට නම් ඊට සෙසු පාර්ශ්ව වල සහයෝගය අවශ්‍යය. සියලු පාර්ශ්වයන් පාර්ථනා කරන්නේ රටේත් ජනතාවගේත් අභිවෘද්ධිය නම් එසේ එකතු වී වැඩ කර රට වැටී තිබෙන වළෙන් ගොඩ දැමීම සඳහා සහයෝගය ලබා දීමෙන් කිසිදු පාර්ශ්වයකට අගතියක් සිදු වන්නෙ නැත. බලය සඳහා කරන දේශපාලනික සෙල්ලම් කරන්න අවශ්‍ය භුමිය අප නිසි පරිදි ගොඩ නගා නොගත්තොත් හැමදාම එකිනෙකාට කුලල් කා ගනිමින් මේ වළ තුළටම වී සියල්ල විනාශ වී යන තෙක් සිටිය හැකිය. එතකින්ම රටත් සම්පූර්ණයෙන්ම වැළලී යනු ඇත.
අද බහුතර ජනතාව වෙතින්ද කෙරෙන එල්ලීම වී ඇත්තේ මේ අමාරු අවස්ථාවේදී සියලු දෙනා එක්වී රට වළෙන් ගොඩගැනීම විය යුතු බවය. ජනාධිපතිවරයා අද පාර්ලිමේන්තුව හමුවේ ප්‍රකාශ කළේ, ඉල්ලා සිටියේත් ඒ ඉල්ලීමමය. ජනාධිපතිවරයාගේ ධුර කාලය තුළ මොන මොනවා හෝ සිදු කර අවශ්‍ය නම් ඇස් නිලංකාර කරන මල් වෙඩි සංදර්ශන මඟින් හෝ රට පවත්වාගෙන යෑමේ හැකියාව තිබේ. එහෙත් විය යුත්ත එය නොවේ. අවංකවම රට මේ තිබෙන තත්වයයෙන් ගොඩ දා ගැනීමය. ජනාධිපතිවරයා තමන්ගේ මූලික වගකීම තමන් රටට පොරොන්දු වූ වැඩපිළිවෙළ සාර්ථක කර ගැනීම බව අවධාරණය කළේ අවශ්‍යනම් විපක්ෂ පාර්ශ්ව වල සහය ලැබේ නම් එතැනින් එහාට වුව යෑමට ඔහුගේ ඇති සූදානමද ගැනද ඉඟියක් ලබා දෙමින් බවත් පැහැදිලිය.
මෙතුවක් කල් ජනාධිපති ගෝඨාභය ප්‍රමුඛ ආණ්ඩුව විසින් සිදු කළ ප්‍රමුඛ කාර්යභාරයන් ගනනාවක් ගැනද අද පාර්ලිමේන්තුව හමුවේ ඔහු පෙන්වා දීමත් වැදගත් දෙයකි. ඒ අනුව වසංගතය හමුවේත් වසර දෙකක් නිකම්ම ගෙවී ගියේ නැති බව පෙන්වා දී තිබේ. වැඩ ගොඩක් කෙරී ඇත. එහෙත් ඉදිරියට විය යුතු දේ බොහොමයකි. කෙටිකාලීනවත් මධ්‍ය කාලීනවත් දීර්ගකාලීනවත් සැලසුම් කළ වැඩ පිළිවෙල සාර්ථකත්වයක කරා ගෙන යා යුතුය. එහෙත් ජනාධිපතිවරයාගේ වත්මන් ධුර කාලය අවුරුදු 3 කි. මේ නිසා ඔහුට මෙම වැඩ පිළිවෙල සාර්ථක කර ගැනීම උදෙසා සාධාරණ අවස්ථාවක් කාලයක් ලැබීම විය යුතුය. ඒ වෙනුවෙන් තමන්ට සහයෝගයක් දෙන මෙන් ඔහු අවංකවම කළ ඉල්ලීම ගැන මහජන නියෝජිතයන් කල්පනා කළ යුතුය. දේශපාලන බලය උදෙසා කාකොට ගන්නවාට වඩා අවංක නායකයෙකුගෙ අවංක ඉල්ලීම ගැන ඔවුන් සිතා බැලිය යුතුය. ඊට අවශ්‍ය සාධාරණ සහයෝගයක් ලබා දීම විය යුතුය. ඒ මෙ මොහොතේ රටට , රට වැසියා වෙනුවෙන් කරන යුතුකමක් වගකීමක් ලෙස සැලකිය හැකි නම් මේ රට යහපත් අනාගතයක් සහිත සෞභාග්‍යමත් රටක් වීම නොවැලැක්විය හැකිවනු ඇත.
- the novemberist
