හදිසි අනතුරකට ලක්වූ පුද්ගලයෙකුගේ අතක් එම පුද්ගලයාගේම කකුලේ වළලුකර ප්‍රදේශයට බද්ධ කිරීම මගින් බේරාගැනීමට චීන වෛද්‍යවරුන් පිරිසක් සමත් වී තිබෙනවා. මෙම විශේෂ සැත්කම සිදුවී තිබෙන්නේ චීනයේ මධ්‍යම ප්‍රදේශයේ හුනාන් පළාත් රෝහලක් තුලයි.
Zhou නම් පුද්ගලයාගේ අත රැකියාව අතර තුර සිදු වූ හදිසි අනතුරකින් තුවාල සිදුව තිබෙනවා. වෙනත් ප්‍රතිකාරවලින් අනතුරුව වෛද්‍යවරුන්ගේ තීරණය වී තිබෙන්නේ එම අත නැවත බද්ධ කිරීමට කටයුතු කිරීමයි.
නමුත් අතට සිදු වී පැවති තදබල හානිය හේතුවෙන් නහර සහ ස්නායු සුවපත් වීමට යම් කාලයක් අවශ්‍ය වී තිබෙනවා. ඒ හේතුව නිසා අත සජීවී තත්ත්වයෙන් රැකගැනීම සඳහා කකුලට තබා මැසීම සිදු කර තිබෙනවා. යම් අවයවයකට සාමාන්‍ය උෂ්ණත්වයක් යටතේ පැය 10ට වඩා ලේ ගමනාගමනය නිසි පරිදි සිදු නොවුනොත් එහි ඇති පටක මිය යාහැකි බව වෛද්‍ය මතයයි.
මීට පෙරත් 2013 වසරේ මේ ආකාරයේම අතක් අහිමි වූ පුද්ගලයෙකුට අතක් ලබාදීමට චීන වෛද්‍යවරුන් පිරිසක් සමත් වී තිබුණා .
මේ වනවිට Zhouට අත බද්ධ කර අවසන් වුවත් අත සාමාන්‍ය තත්ත්වයට පත්වීමට මාසයක කාලයක් ගතවිය හැකි බව වෛද්‍යවරුන් පවසනවා.
