ඇත්තටම අමිතාබ් ගැන මේ තරමට කතා වෙන්න ඔහු කළේ මොකක්ද?
ඉන්දියාවේ 1398ක් වූ ගොවීන් පිරිසකගේ සියලුම ණය මුදල් ගෙවීමේ වගකීම අමිතාබ් භච්චන් විසින් භාරගෙන තිබෙනවා. ඔහු මේ වෙනුවෙන් වැය කර ඇති මුළු මුදල ඉන්දීය රුපියල් මිලියන 40ක්.
අමිතාබ් ඔහුගේ බ්ලොග් අඩවියට සටහනක් තබමින් මෙය තමාගෙන් ඉටුවිය යුතු කාර්යයක් ලෙස සලකා ගොවීන්ගේ ණය මුදල් ගෙවාදැමීමට ක්‍රියාකළ බව පවසා තිබෙනවා.
මෙහි විශේෂත්වය වන්නේ ඔහු ණය ගෙවීම සිදුකර තිබෙන්නේ සිය උපන් ප්‍රදේශය වන උත්තර් ප්‍රදේශ් ප්‍රාන්තයේ ගොවීන්ගේ වීමයි.
ඉන්දියාව තුළ දස දහස් ගණනක් වූ ගොවීන් බොහෝවිට අධික ණය බර නිසා පීඩාවට පත්ව සිටින අතර, පවතින දැඩි නියං තත්ත්වය මෙන්ම, වර්ෂාපතනයේ වෙනස්වීම්, ඵලදායීතාව අඩුවීම මෙන්ම, ඔවුන්ට නවීන වගා ක්‍රම වෙත යොමුවීමට නොහැකිවීම යන කාරණා නිසා කෘෂිකර්මාන්තය දැඩි අර්බුදයකට ලක්ව තිබෙනවා.
මෙම තත්ත්වය නිසා 1995 වසරේ සිට මේ දක්වා ඉන්දීය ගොවීන් ලක්ෂ තුනකට අධික පිරිසක් සියදිවි හානිකර ගෙන තිබෙනවා.
