මෙය මේ දිනවල ලොව පුරා අතිමහත් ජනප්‍රියත්වයක් අත්කරගෙන ඇති ‘අයිස් බකට් චැලේන්ජ්‘ (අයිස් බාල්දි අභියෝගය) නම් ව්‍යාපෘතිය ඉන්දියාවට ගැලපෙන සේ වෙනස් කර ඇත්තකි.
‘අයිස් බකට් චැලේන්ජ්‘ හිදී සිදුවන්නේ අයිස් පිරි ජල බාල්දියකින් හොඳ හැටි නාගන්නා පුද්ගලයෙකු තම සගයින් තිදෙනෙකුට හැකිනම් ඔවුන්ද අයිස් ජලයෙන් නාගෙන පෙන්වන සේ අභියෝග කිරීමයි.
මෙය ඉතා බරපතල ගණයේ ස්නායු රෝගයකින් පෙළෙනා රෝගීන් වෙනුවෙන් අරමුදලක් පිහිටුවීමේ අරමුණ ඇතිව ආරම්භ කෙරුණු ප්‍රචාරක වැඩසටහනක් වන අතර කිසිවෙකුත් නොසිතූ පරදි එය කෙටි කලකින්ම ඉහළ ජනප්‍රියත්වයක් අත් කර ගැනීමට සමත් විය.
දැනටමත් ලොව ප්‍රකට නලූ නිළියන්, ක්‍රීඩක ක්‍රීඩිකාවන්, ව්‍යාපාරිකයින්, විද්‍යාඥයින්, වෛද්‍යවරුන් ආදී පුද්ගලයෝ රාශියක් මෙසේ අයිස් වතුරෙන් නාගෙන ඇත.අරමුදලට මේ වන විට ඩොලර් ලක්ෂ 200 කට වඩා ආධාරද ලැබී තිබේ.
මේ අනුව යමින් ඉන්දියා මාධ්‍යවේදිනියක වන මන්ජු ලතා ඉන්දියා ජනතාව වෙනුවෙන් යැයි කියා ‘රයිස් බකට් චැලේන්ජ්‘ හදුන්වාදීමට කටයුතු කර තිබේ.
මෙහිදී සිදුවන්නේ අයිස් වතුර නෑවාක් මෙන් සහල් පිරි බාල්දියකින් නා ගැනීම නොව සහල් පිරි බාල්දියක් කවර හෝ දිළිදු පවුලකට ප්‍රදානය කිරීමයි.අනතුරුව එය ප්‍රදානය කරන්නා තවත් පුද්ගලයින් තිදෙනෙකුට හැකි නම් එසේ සහල් බාල්දිය බැගින් ප්‍රදානය කර පෙන්වන්නැයි අභියෝග කරයි.
අභියෝගය ආරම්භ කළ මන්ජු ලතා මේ වන විටත් සහල් බාල්දියක් ප්‍රදානය කර අවසන්ය ඇය අභියෝග කළ පුද්ගලයින් තිදෙනාද එය භාරගෙන ඇතැයිද නුදුරේදීම ඔවුන් සහල් බාල්දි ප්‍රදානය කරනු ඇතැයිද ඇය පවසා තිබේ.
ඇය මේ වෙනුවෙන් ෆේස්බුක් පිටුවක්ද ආරම්භ කර තිඛෙන අතර දැනටම එහි සාමාජිකයෝ 2000 ක් පමණ සිටින බවයි වාර්තා වේ.
