ඔහු ගාසා තීරයට යාම සලකා බලන්නේදැයි වාර්තාකරුවෙකු විමසූ විට ට්‍රම්ප් පිළිතුරු දුන්නේ, "මම එහෙම කරනවා. මම එය කරන්න ඉඩ තිබෙනවා"යනුවෙන්.
ජනාධිපතිවරයා වැඩිදුරටත් සඳහන් කළේ ඔහු බොහෝ දුරට ඊජිප්තුවට යන බවයි.
ඔහු පෙන්වා දුන්නේ සාකච්ඡා සඳහා "දැනට සියලු දෙනාම රැස්ව සිටින්නේ එතැන" බවයි.
ධවල මන්දිරයේ ප්‍රකාශයකට අනුව, ට්‍රම්ප් ජනාධිපතිවරයා ඔහුගේ සාමාන්‍ය වාර්ෂික තත්ත්වය සළකාබැලීම සඳහා හෙටවෝල්ටර් රීඩ් වෛද්‍ය මධ්‍යස්ථානයට පැමිණීමට නියමිතයි. එම ප්‍රකාශයේ තවදුරටත් සඳහන් වූයේ ජනාධිපතිවරයා"ඉන් කෙටි කලකට පසු මැදපෙරදිගට යාම ගැන සලකා බලනු ඇති"බවයි.
ඇමරිකානු ජනාධිපති ඩොනල්ඩ් ට්‍රම්ප් විසින් ඊශ්‍රායලය සහ හමාස් සංවිධානය අතර සාම සැලැස්මේ පළමු අදියර සඳහා දෙපාර්ශ්වයම අත්සන් තබා ඇති බව නිවේදනය කළා.
මෙම සාම ගිවිසුම ක්‍රියාත්මක කිරීමේ සහ අධීක්ෂණය කිරීමේ පියවරක් ලෙස ට්‍රම්ප්ගේ මෙම මැදපෙරදිග සංචාරය වැදගත් වනු ඇතැයි අපේක්ෂා කෙරෙනවා.
ට්‍රම්ප් මෙම ප්‍රවෘත්තිය පවසමින් මෙය ලෝකයටමඉතාම ශ්‍රේෂ්ඨ දිනයක්ලෙසද හඳුන්වනවා.
අමෙරිකානු රාජ්‍ය ලේකම් මාර්කෝ රුබියෝ විසින් ධවල මන්දිරයේ පැවති රැස්වීමකදී ට්‍රම්ප් ජනාධිපතිවරයාට සටහනක් ලබා දීමෙන් පසුව මෙම ප්‍රවෘත්තිය ප්‍රකාශයට පත් කිරීමට ඔහු කටයුතු කර තිබුණා.
ගැඹුරු සාකච්ඡා කිහිපයකින් පසුව, ඊශ්‍රායලය සහ හමාස් ගාසා තීරය සඳහා වන සාම සැලැස්මේ පළමු අදියර සම්බන්ධයෙන් එකඟතාවකට පැමිණ තිබෙනවා.
මෙම පළමු අදියර යටතේ සියලුම ප්‍රාණ ඇපකරුවන් ඉතා ඉක්මනින් නිදහස් කරනවා.
ඊශ්‍රායලය ඔවුන්ගේහමුදා එකඟ වූ සීමාවකට ඉවත් කර ගන්නා බවයි සඳහන් වන්නේ.
එමෙන්ම සියලුම පාර්ශ්වයන්ට සාධාරණව සලකන බවත්, මෙය ස්ථිරසාර සාමයක් කරා යන පළමු පියවර බවත් ට්‍රම්ප් පවසා තිබෙනවා.
මෙම ගිවිසුම පසුගිය සතියේ ට්‍රම්ප් විසින් ප්‍රකාශයට පත් කරන ලද කරුණු 20කින් යුත් සැලැස්මේ පළමු අදියරයි.
ඊශ්‍රායල අගමැති බෙන්ජමින් නෙතන්යාහු මෙම එකඟතාවය‘ඊශ්‍රායලයට ශ්‍රේෂ්ඨ දිනයක්’ලෙස හඳුන්වා තිබෙනවා.
ගිවිසුම අනුමත කිරීම සඳහා ඔහු අද බ්‍රහස්පතින්දා රජය කැඳවීමට නියමිතය.
ඊශ්‍රායල රජය විසින් ගිවිසුම අනුමත කළ පසු සටන් විරාමයක් ක්‍රියාත්මක වනවා.
හමාස් සංවිධානය ද ගිවිසුම තහවුරු කර ඇති අතර, ඊශ්‍රායලයට සම්පූර්ණයෙන්ම ගිවිසුම පිළිපැදීමට බල කරන ලෙස ට්‍රම්ප්ට සහ සම්බන්ධිත රටවලට ඉල්ලා සිටිනවා.
මෙම ගිවිසුම පැවැතියහොත්, ට්‍රම්ප් එය ඔහුගේ දෙවන ධුර කාලයේවිදේශ ප්‍රතිපත්ති ක්ෂේත්‍රයේ විශිෂ්ටතම ජයග්‍රහණයලෙස පෙන්වා දෙනු ඇතැයි වාර්තාකරුවන් පවසනවා.
සාකච්ඡා තවදුරටත් ඉදිරියට ගෙන යාමට ට්‍රම්ප්ගේ පුද්ගලික මැදිහත්වීම තීරණාත්මකයි.
ඔහු හමාස් සහ ඊශ්‍රායලය යන දෙපාර්ශ්වයටම ගිවිසුමක් සඳහා පීඩනය යොදා තිබෙනවා.
කෙසේ වෙතත්, වසර දෙකකට පසු යුද්ධය අවසන් කිරීමට මෙය බලාපොරොත්තුවක්.
ගාසා තීරය පාලනය කරන්නේ කවුරුන්ද යන්න සහ හමාස් සංවිධානයේ අනාගතය ඇතුළු තීරණාත්මක කරුණු තවමත් සාකච්ඡා කිරීමට අවශ්‍යයි.
ඊජිප්තුවේදී පැවති මෙම සාකච්ඡා පැමිණියේ 2023 ඔක්තෝබර් 7 වන දින හමාස් ප්‍රමුඛ සන්නද්ධ පුද්ගලයන් 1,200 ක් පමණ ඝාතනය කර 251 දෙනෙකු ප්‍රාණ ඇපකරුවන් ලෙස රැගෙන යාමේ ප්‍රහාරයට ප්‍රතිචාර වශයෙන් ඊශ්‍රායලය ගාසා තීරයේ මිලිටරි මෙහෙයුමක් දියත් කිරීමෙන් වසර දෙකක් සහ දින දෙකකට පසුවයි.
එතැන් සිට ඊශ්‍රායල හමුදා මෙහෙයුම් මගින් අවම වශයෙන්67,183 දෙනෙකු ඝාතනය කර තිබෙනවා.
ඊට ළමුන් 20,179 ක් ද ඇතුළත් බව හමාස් පාලනය කරන සෞඛ්‍ය අමාත්‍යාංශය වාර්තා කළා.
සටන් විරාම සහ ප්‍රාණ ඇපකරුවන් නිදහස් කිරීමේ ගිවිසුම පිළිබඳ පුවත ප්‍රකාශයට පත් කිරීමෙන් පසු ගාසා තීරයේ පලස්තීනුවන් ප්‍රීති වන වීඩියෝ දර්ශන සමාජ මාධ්‍යවල සංසරණය වීමට පටන් ගෙන තිබෙනවා.
දීර් අල්-බාලාහි අල්-අක්සා රෝහලෙන් පිටත විශාල පිරිසක් රාත්‍රී කාලයේදී සංගීතයට නටමින්, විසිල් ගසමින්, අත්පුඩි ගසමින් සහ "අල්ලාහු අක්බර්" "ශ්‍රේෂ්ඨතමයා දෙවියන් වහන්සේයි"යනුවෙන් ගායනා කළ බව පලස්තීන මාධ්‍යවේදියෙක් සමාජ ජාලයේ පළ කළ වීඩියෝවල දැක්වෙනවා.
-හිරු නිවුස්
