තායිපේ ගුවන්තොටුපළින් ගුවන්ගත වූ GE235 ටාන්ස් ඒෂියා යානය තුළ මගීන් 58දෙනෙක් සහ කාර්ය මණ්ඩලය ගමන් ගත් අතර ගුවන් ගත වී නොබෝ වේලාවකින් එය තායිවානයේ නොගැඹුරු ගංගාවකට කඩා වැටිණි.

තායිවානයේ සිවිල් ගුවන්සේවා පරිපාලනය පවසන්නේ 15 දෙනෙකු පමණ දිවි ගලවා ගැනීමට සමත් වී ඇති බවයි. මියගිය අය අතුරින් 16ක්ම යානයේ ගමන්ගත් චීන සංචාරකයන්ය.

ගුවන් යානයේ නියමුවා වූයේ 42 හැවිරිදි ලියාඕ චියෙන් සුන්ය. ඔහුත් සමඟ යානයේ සහායක නියමුවාද ජීවිතක්ෂයට පත් වූ බව සිවිල් ගුවන්සේවා පරිපාලනය පවසයි.

ගුවන් යානය අනතුරට පත් වන අවස්ථාව ඉතා අහඹු ලෙස ඡායාරූප ගත කිරීමට එම අවස්ථාවේ මෝටර් රථයක ගමන් කළ මගියකු සමත් වී තිබුණි.

ගංගාවට වැටීමට පෙර මහල් නිවාස හා වානිජ ගොඩනැගිලි අතරින් යානය ගෙනැවිත් කිට්ටුවෙන්ම පිහිටි තායිපේ හි ෂොංග්ෂාන් ගුවන්තොටුපළ දක්වා ගෙන ඒමට ගුවන් නියමු ලියාඕ උත්සාහයක් ගත් බව තායිවාන මාධ්‍ය වාර්තා කර තිබිණි.