අදාළ චක්‍රලේඛයෙන් සිදුවන බලපෑම පිළිබඳ විමසා බැලීම සඳහා ඊයේ (26) දින වෙළෙඳ අමාත්‍යාංශයේ විෂය භාර ඇමැති බන්දුල ගුණවර්ධන සමග පැවැති විශේෂ සාකච්ඡාවකදී මෙම විරෝධය පළව ඇත්තේ.
ශ්‍රී ලංකා මහා බැංකුව වාණිජ බැංකුවලට මාස තුනක කාලයක් සඳහා ‘ඉදිරි විනිමය ගිවිසුම්වලට’ එළැඹීම තහනම් කර තිබේ. මහා බැංකු අධිපති ඩබ්ලිව්.ඩී. ලක්ෂ්මන්ගේ නියෝග මත පෙරේදා (25 වැනිදා) සිට ක්‍රියාත්මක වන පරිදි මීට අදාළ චක්‍රලේඛය නිකුත් කර ඇත.
මෙම නියෝගය හේතුවෙන් සීනි පරිප්පු සහ ඖෂධ ඇතුළු සියලුම භාණ්ඩ ආනයනකරුවන්ට තමන් ආනයනය කරන භාණ්ඩ වෙනුවෙන් ගෙවීම් කිරීමට සිදුවන්නේ භාණ්ඩ මෙරටට ලැබෙන අවස්ථාවේ පවතින ඩොලරයේ අගයට අනුවය. එනම් ඩොලරයේ අගය ඉහළ යනු ඇති අපේක්ෂාවෙන් භාණ්ඩ මිලදී ගැනීම වෙනුවෙන් බාහිර වෙළෙඳපොළෙන් (වාණිජ බැංකු හරහා) නියමිත අගයකට ඩොලර් මිලදී ගැනීමේ හැකියාව මෙම නියෝගයෙන් අත්හිටුවා ඇත.
කෙසේ වෙතත් මෙම චක්‍රලේඛය පිළිබඳ අදහස් දක්වමින් බන්දුල ගුණවර්ධන ඇමැතිවරයා පවසා ඇත්තේ ඉදිරියේ දී ඩොලරයේ මිල යළිත් පහත වැටෙනු ඇතැයි අපේක්ෂා කරන බැවින් මෙලෙස ඩොලර් මිලදී ගැනීම සඳහා ‘ඉදිරි ගිවිසුම්’වලට එළැඹීම අත්හිටුවීමෙන් වෙළෙඳුන්ට බලපෑමක් එල්ල නොවන බවයි. එසේම මෙය තාවකාලික පියවරක් බවද ඇමැතිවරයා පෙන්වා දී ඇත.
-පංචාලි අබේසේකර
