පොලිස් විශේෂ කාර්ය බළකායේ කැබැතිගොල්ලෑව කඳවුරේ නිලධාරීන් විසින් ඊරට්ටපෙරියකුලම් ප්‍රදේශයේදී මෝටර් රථයක් පරීක්ෂා කිරීමේදී කේරළ ගංජා කිලෝ 18ක් සොයාගෙන තිබේ.
එහිදී සැකකරුවන් දෙදෙනෙකු අත්අඩංගුවට ගෙනඇති අතර ඔවුන් කොළඹ 09 සහ කොළඹ 15 යන ප්‍රදේශවල පදිංචිකරුවන් ය.
මේ අතර පානදුර උතුරු පොලිස් ස්ථානය මගින් හොරේතුඩුව ප්‍රදේශයේදී සිදුකළ වැටලීමකදී හෙරොයින් ග්‍රෑම් 10ක් සමග සැකකරුවෙකු අත්අඩංගුවටගෙන තිබේ.
මාලිගාවත්ත, ගල්කිස්ස, මෝදර ආදී ප්‍රදේශවලදී ද එවැනි වැටලීම් සිදුකර තිබුණි.
දිවයිනේ තවත් ප්‍රදේශ රැසකදී ඊයේ දිනයේ මත්ද්‍රව්‍ය වැටලීම් සිදුවූ බව නියෝජ්‍ය පොලිස්පති අජිත් රෝහණ පවසයි.
මේ අතර කල්පිටිය කලපු ප්‍රදේශයේ කළ මෙහෙයුමකදී කූඩුදැල් 37 සොය ගැනුනා. එහි වටිනාකම රුපියල් ලක්ෂ 6 කට ආසන්න බවයි පුත්තලම සහකාර ධීවර අධ්‍යක්ෂ සුමින්ද වික්‍රමාරච්චි සදහන් කරන්නේ.
කූඩු දැල් භාවිත කරමින් මසුන් මැරීම ධීවර ආඥාපනත අනුව සම්පූර්ණයෙන්ම තහනම් වනවා. මෙම කූඩුදැල්වලට කුඩා ප්‍රමාණයේ මසුන් සහ ඉස්සන් පැටලී හානි සිදුවීම ඊට හේතුවයි. කූඩුදැල් භාවිතයෙන් මසුන් මැරීම හේතුවෙන් බොහෝකලපු මල කලපු බවට පත්වන බවයි ධීවර නිලධාරීන් පවසන්නේ.
-පංචාලි අබේසේකර
