ඊයේ (01) රාත්‍රියේ අමාත්‍ය මණ්ඩල රැස්වීම ජනාධිපති ගෝඨාභය රාජපක්ෂගේ ප්‍රධානත්වයෙන් රැස් වූ අතර එහිදී එම යෝජනාවට අමාත්‍ය මණ්ඩල අනුමැතිය හිමිවූ බව අමාත්‍ය උදය ගම්මන්පිල ප්‍රකාශ කර තිබේ.
2015 වසරේ ජනවාරි මස 15 වනදා සිට 2018 වසරේ දෙසැම්බර් 31 දක්වා කාලය තුළ රාජ්‍ය ආයතනවල සිදුවී ඇති බව කියන දූෂණ වංචා පිළිබඳ සොයාබැලීම සඳහා පත්කරන ලද ජනාධිපති කොමිෂන් සභා වාර්තාව පසුගියදා ජනාධිපතිවරයා වෙත භාර දී තිබුණි.
ඒ අනුව එළඹෙන පළමු පාර්ලිමේන්තු සැසිවාරයේදී එය පාර්ලිමේන්තුවට ඉදිරිපත් කර විවාදයට ගැනීමට නියමිතය.
එමෙන්ම දේශපාලන පළිගැනීම් පිළිබඳ කොමිෂන් සභා වාර්තාවද එම පළමු සැසිවාරයේදී විවාදයට ගැනීම සඳහා අමාත්‍ය මණ්ඩල අනුමැතිය හිමිවූ බවද අමාත්‍ය උදය ගම්මන්පිල සඳහන් කර ඇත.
-පංචාලි අබේසේකර
