වැටුප් විෂමතා මුල්කර ගනිමින් ගුරු සංගම් ඒකාබද්ධව වෘත්තීය ක්‍රියාමාර්ගය ආරම්භකර අදට දින 16 ක් සපිරෙනවා. වෘත්තීය ක්‍රියාමාර්ගය හේතුවෙන් ඔන්ලයින් අධ්‍යාපන කටයුතු වලින් ද සම්පූර්ණයෙන් ඉවත්වීමට ගුරුවරුන් ක්‍රියාකර තිබෙනවා. තම ඉල්ලීම්වලට විසදුම් ලබාදෙන ලෙස ඉල්ලා ගුරු සංගම් අඛණ්ඩව උද්ඝෝෂණ ක්‍රියාමාර්ගයක නිරතව සිටිනවා. කෙසේ වෙතත් වැටුප් විෂමතාවලට අදාළව කැබිනට් පත්‍රිකාව අමාත්‍ය මණ්ඩලයට ඊයේ දිනයේ ඉදිරිපත් කළ බවයි අධ්‍යාපන අමාත්‍ය මහාචාර්ය ජී එල් පීරිස් මහතා සදහන් කළේ. මේ අතර ගුරු වැටුප් විෂමතාව සම්බන්ධයෙන් විශේෂ සාකච්ඡාවක් අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් මේ වනවිට පැවැත්වෙනවා.
මෙම සාකච්ඡාවට සහභාගිවීමට පෙර ලංකා ගුරු සංගමයේ ප්‍රධාන ලේකම් ජෝසප් ස්ටාලින් මහතාගේ ප්‍රධානත්වයෙන් මාධ්‍ය හමුවක් පැවැත්වුණා.
මේ අතර ශ්‍රී ලංකා පොදුජන අධ්‍යාපන සේවා සංගමයේ සභාපති වසන්තා හදපාන්ගොඩ මහත්මිය ප්‍රකාශ කළේ මේ සම්බන්ධයෙන් අමාත්‍ය බැසිල් රාජපක්ෂ මහතා සමග ද සාකච්ඡා පැවැත්වූ බවයි.
ගුරු වෘත්තීය ක්‍රියාමාර්ගය සම්බන්ධයෙන් අද පැවති කැබිනට් තීරණ දැනුම් දීමේ මාධ්‍ය හමුවේදී ද අමාත්‍ය රමේෂ් පතිරණ මහතා කරුණු පැහැදිලි කළා.
-ITN
