අධිකරණ තීන්දුවට අනුකූලව පමණක් ගෑස් අලෙවිය සිදු කරන ලෙසට ලිට්රෝ සහ ලාෆ් ගෑස් සමාගම් වෙත පාරිභෝගික අධිකාරිය දැනුම් දි තිබුණා. සිවිල් සංවිධාන ක්‍රියාකාරිකයෙකු වන නාගානන්ද කොඩිතුවක්කු මහතා ඉදිරිපත් කළ පෙත්සමට අදාළව අතුරු නියෝගයක් ප්‍රකාශයට පත් කරමින් අභියාචනාධිකරණය ලිට්රෝ සහ ලාෆ් ගෑස් සමාගම් වෙත පසුගියදා නියෝග කළේ ශ්‍රී ලංකා ප්‍රමිති කාර්යාංශයේ නිර්ණායකයන්ට අනුකූලව පමණක් ගෘහස්ථ ගෑස් සිලින්ඩර වෙළෙඳපොළට නිකුත් කරන ලෙසයි. එමෙන්ම නව ගෑස් සිලින්ඩරවල අදාළ සංයුතිය ප්‍රදර්ශනය කරන ලෙසත් අධිකරණය වැඩිදුරටත් නියෝග කළා.
මේ අතර පසුගියදා වෙළෙඳපොළට නිකුත් කෙරුණු ගෑස් සිලින්ඩරවල සඳහන් වුණේ ප්‍රොපේන් සංයුතිය 25%ත් 40%ත් බියුටේන් සංයුතිය 60%ත් 75%ත් ලෙසයි. කෙසේ වෙතත් අද සිට නව ගෑස් සිලින්ඩරවල ප්‍රොපේන් සංයුතිය 30%ක් ලෙසින් මුද්‍රණය කර වෙළෙඳපොළට නිකුත් කෙරෙනවා.
-පංචාලි අබේසේකර
