ශ්‍රී ලංකා කණ්ඩායම ප්‍රසාද ලකුණු සටහනේ 07 වන ස්ථානයේ පසුවන අතර එංගලන්ත කණ්ඩායම එම සටහනේ අට වන ස්ථානයේ පසුවේ.
ඒ අනුව තරගාවලියේ ඉදිරියට යාම සඳහා අද තරගය ජය ගැනීම කණ්ඩායම් දෙකටම තීරණාත්මක වනු ඇත.
එක්දින ලෝක කුසලාන තරගාවලියේ වත්මන් ශූර එංගලන්ත කණ්ඩායම මේ වන විට දරුණු පසු බැසීමකට ලක්ව සිටියදී ශ්‍රී ලංකාවට හමුවන හෙයින් ශ්‍රී ලංකාව සිය දෙවැනි ජයග්‍රහණය අපේක්ෂාවෙන් තරග බිමට පිවිසේ. එමෙන්ම එංගලන්තයද ශ්‍රී ලංකා පිලෙන් ජයග්‍රහණය උදුරාගෙන හෝ බිඳ වැටී ඇති රිද්මය යළි ගොඩනඟා ගැනීමට වෙහෙසෙනු ඇත.
කෙසේ වුවද ලෝක කුසලාන ක්‍රිකට් ඉතිහාසයේදී එංගලන්තය හා ශ්‍රී ලංකාව 2007 සිට 2019 දක්වා හමුවූ අවසන් අවස්ථා හතරේදීම එංගලන්තය පරාජය කිරීමට ශ්‍රී ලංකාව සමත්ව ඇත. එදා මෙදාතුර ලෝක කුසලාන තරග අවස්ථා 11කදී ශ්‍රී ලංකාව හා එංගලන්තය හමුවී ඇති අතර, එහිදී එංගලන්තය ජයග්‍රහණ 6ක් හා ශ්‍රී ලංකාව ජයග්‍රහණ 5ක් ලබා කරට කර සිටිති.
ඊයේ පැවති මාධ්‍ය හමුවේදී එංගලන්ත ක්‍රීඩක මොයින් අලී පැවසුවේ ශ්‍රී ලංකාව සමඟ තරගයෙන් පැහැදිලි ජයග්‍රහණයක් බලාපොරොත්තු වන බවය. “ මේ ලෝක කුසලාන තරගාවලියේ රැඳී සිටීමට නම් අපට ජයග්‍රහණය අවශ්‍යයි. ශ්‍රී ලංකාව හොඳ කණ්ඩායමක්. පසුගිය තරගවලදී අපගේ හොඳම පිතිකරුවන් හය දෙනා ලකුණු අතරට ආවේ නෑ. නමුත් බැංගලෝර් තණතිල්ල ලකුණු ලබාගත හැකි එකක්. මා හිතනවා වෙනසක් කළ හැකියි කියා“ මොයින් අලී සඳහන් කළේය.
-P.M
