ජාතික පශු සම්පත් සංවර්ධන මණ්ඩලයට අයත් කුකුළු ගොවිපොළවල  බිහි කරනු ලබන පිරිමි කුකුළු පැටවුන් කිසිදු ප්‍රයෝජනයකට නොගෙන ඌරු ගොවිපොළවල  ඌරන්ට කෑම සඳහා යොදන බවට කෘෂිකර්ම අමාත්‍යාංශයට තොරතුරු ලැබී තිබිණි.

මෙම කුකුළු පැටවුන් සතිපතා 5000ක් බැගින් ඒ අන්දමට ඌරු  ගොවිපොළවලට ලබා දී ඇත.

රැකියා විරහිතව සිටින පුද්ගලයින්ට මෙම සතුන් නොමිලයේ ලබා දී ඔවුන්ගේ දෛනික ආදායම වැඩි කිරීමේ වැඩ පිළිවෙළක් ආරම්භ කරන ලෙස  කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා ජාතික පශු සම්පත් සංවර්ධන මණ්ඩලයට උපදෙස් දුන්නේය.

ඒ අනුව මෙතෙක් සතියකට පිරිමි කුකුළු පැටවුන් 5000ක් බැගින් ඌරන්ගේ ආහාරය සඳහා යොදවා තිබු අතර  එම සතුන් මස් පිණිස කුකුළු පාලනය සඳහා කැමැති පුද්ගලයින් අතර බෙදා දීමට ජාතික පශු සම්පත් සංවර්ධන මණ්ඩලය පියවර ගත්තේය. මෙම පියවර මඟින් කුකුළු මස් හිඟයකින් තොරව වෙළඳපොළට පැමිණීම සිදු වෙනු ද ඇත.

මේ අතර මේ අතර බිත්තර නිෂ්පාදනය ඉහළ නැංවීමේ අරමුණින් 'ජාතික හදබිම අධිකාරිය' ද නොමිලේ ගැහැණු පැටවුන් ලබාදීමේ වැඩසටහනක් ආරම්භ කර තිබේ.

බිත්තර කර්මාන්තයේ ජීවනෝපාය දියුණු කිරීමේ වැඩසටහනක් ලෙස අඩු ආදායම්ලාභී පවුල් අතර කිකිළියන් 20,000ක් පමණ බෙදා දී ඇත. මෙම වැඩසටහන යටතේ එක් පවුලකට ගැහැණු පැටවුන් 10ක් හෝ 20ක් ලබාදීමට පියවර ගෙන ඇත.

මේ වනවිට මෙම වැඩසටහන යටතේ බෙදාහරින කිකිළියන්ගේ බිත්තර වෙළෙඳ පොළට පැමිණෙමින් පවතින අතර, මෙම කර්මාන්තයේ නියැළෙන ජනතාවටද අමතර ආදායමක් උපයා ගැනීමේ හැකියාව ඇත.