කරාපිටිය ශික්ෂණ රෝහලේ අලුත්වැඩියාවන් සඳහා කෝටි 100ක් ලබාදී ඇති බවත් එම මුදල් යොදවා දැනට වැඩ අවසන් කර නොමැති සියලුම ඒකකයන් සම්පූර්ණ කිරීමට හැකි බවත් අමාත්‍යවරයා කීය. රෝහලට අවශ්‍ය නවීන උපකරණ ලබා ගැනිමට තවත් කෝටි 100 ක් ද මේ යටතේ වෙන්කර දී ඇති බව ද සෞඛ්‍ය අමාත්‍යවරයා සඳහන් කළේය.
බළපිටිය හා ඇල්පිටිය රෝහල් සඳහා මෙම මුදල්වලින් කෝටි 200 ක් වෙන්වන බවත් එයට අමතරව උඩුගම රෝහලට කෝටි 08 ක් ද වෙන්කර ඇතැයි ද අමාත්‍යවරයා කීය.
ගාල්ල දිස්ත්‍රික්කයේ සෞඛ්‍ය සේවා නිලධාරි කාර්යාල 40 සඳහා ද මෙම ප්‍රතිපාදන යටතේම කෝටි 40 ක් වෙන් වී ඇති බව පෙන්වා දුන් සෞඛ්‍ය අමාත්‍යවරයා එම මුදල්වලට අමතරව වෙනත් කටයුතු සදහා රුපියල් කෝටි40 ක් ද වෙන් කර ඇති බවත් මේ මුළු මුදල් කෝටි 500ම ගාල්ල දිස්ත්‍රික්කයේ සෞඛ්‍ය සේවා සංවර්ධන සදහා යොදවනු ලබන බවත් පැවැසීය. මෙම විශේෂ රැස්විම සඳහා අමාත්‍ය ප්‍රසන්න රණතුංග එක්ව සිටි අතර ගාල්ල දිසා ලේකම් ශාන්ත වීරසිංහ විසින් මෙම රැස්විම සංවිධානය කරනු ලැබු තිබිණ.
