පසුගිය ජුනි මාස 15වනදා අලුත්ගම, දර්ගා නගරයේ පැතිර ගිය කල කෝලාහල වලදී සිදු කෙරුණ වෙඩි තැබීම් වලට වගකිව යුත්තන් අත්අඩංගුවට ගන්නා මෙන් කළුතර මහේස්ත්‍රාත් අධිකරණය පොලිසියට නියෝග කර ඇත.දර්ගා නගරයේ ගැටුම් වලින් දෙදෙනකු මියගිය අතර එම මරණ සිදු වී තිබෙන්නේ වෙඩි තැබීම් නිසා බව පශ්චාත් මරණ පරීක්ෂණ වල නිගමනය විය.
ඒ අනුව සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන මෙන් කළුතර අතිරේක මහේස්ත්‍රාත් අයේෂා ආබ්දීන් කොළඹ පොලිස් අපරාධ කොට්ඨාශයට නියෝග කළේය.
ඒ සම්බන්ධයෙන් පරීක්ෂණ මෙහෙයවනු ලබන්නේ කොළඹ පොලිස් අපරාධ කොට්ඨාශය විසිනි.
අගතියට පත් පාර්ශවය වෙනුවෙන් පෙනී සිටින නීතිවේදී ශාෆ්රාෂ් හම්ෂා මහතා මාධ්‍ය වෙත ප්‍රකාශයක් කරමින් එම මරණ දෙකට හේතුව වෙඩි වැදීම බව දැනට නිගමනය වී ඇති බව සඳහන් කළේය.
“එම මරණ තුවක්කුවකින් එල්ල කරන ලද වෙඩි පහර වැදීමෙන් සිදු වූ මරණ වන බව පශ්චාත් මරණ පරීක්ෂණ වල නිගමන වී තිබෙනවා. උණ්ඩයක් හිස් කබලට ඇතුල් වීමෙන් මරණ සිදු වී ඇති බව පරීක්ෂණ වලින් නිගමනය කෙරී තිබෙනවා” නීතිවේදී ශාෆ්රාෂ් හම්ෂා පවසයි.
ඝාතන වලට වගකිව යුත්තන් තවම හඳුනා ගෙන නැති බවත් නීතිවේදී ශාෆ්රාෂ් හම්ෂා සඳහන් කරයි.
