මහජන සේවා සැපයීම සහ උපායමාර්ගික ආර්ථික ක්‍රියාකාරකම් ප්‍රවර්ධනය කිරීම වැනි අරමුණු සාක්ෂාත් කර ගැනීම සඳහා කලකට පෙර පිහිටුවන ලද ඇතැම් රාජ්‍ය ව්‍යවසායයන් ඒවා පිහිටු වීමේ අරමුණු වර්තමානය සමඟ නොගැළපීම සහ වෙළෙඳපොළ අවශ්‍යතා සමග නොගැළපීම යන හේතූන් මත තවදුරටත් පවත්වාගෙන යාම ප්‍රායෝගික නොවීම සහ ඌන මූල්‍ය කාර්යසාධනය ආදී හේතු නිසා අක්‍රිය තත්ත්වයට පත්ව තිබේ.
ජාතික ආර්ථිකයට හෝ රාජ්‍ය සේවා සැපයීමට අර්ථවත් දායකත්වයක් ලබා නොදෙන ව්‍යවස්ථාපිත ආයතන, රාජ්‍ය සංස්ථා හා රජය සතු සමාගම් වැනි විවිධ කාණ්ඩයන්ට අයත් රාජ්‍ය ව්‍යවසායයන් රජයට වැය බරක් වන පරිදි තවදුරටත් පවත්වාගෙන යාම වෙනුවට, එම ආයතන ඈවර කර වසා දැමීම යෝග්‍ය බවට හඳුනාගනු ලැබ ඇත.
ඒ අනුව, මුදල්, ක්‍රමසම්පාදන සහ ආර්ථික සංවර්ධන අමාත්‍යවරයා ලෙස ජනාධිපති අනුර කුමාර දිසානායක මහතා විසින් ඉදිරිපත් කර ඇති යෝජනාව සැලකිල්ලට ගෙන, එම අමාත්‍යාංශය යටතේ ස්ථාපිත කරනු ලබන විශේෂ ඈවර කිරීමේ ඒකකයක අධීක්ෂණය යටතේ දැනට ක්‍රියාකාරී මට්ටමේ නොමැති රාජ්‍ය ව්‍යවසායයන් 33ක් අදියර 02ක් යටතේ විධිමත්ව වසා දැමීමට අනුමැතිය හිමිව තිබේ.
මෙම තීරණය පසුගිය ආණ්ඩු සමයේ තුළත් ගනු ලැබු නමුත් ඒ ක්‍රියාත්මක කරවීමට බාධාවන් සහ ප්‍රමාදයන් සිදු විය.
පසුගිය ආන්ඩුව විසින් රජය ව්‍යාපාර නොකළ යුතුය යන ප්‍රතිපත්තිය මත හිඳිමින් රාජ්‍ය ව්‍යවසායකයන් ප්‍රතිව්‍යුහගත කිරීමේ වැඩ පිළිවෙලක් ආරම්භ කර තිබණි. එයට එවකට විපක්ෂයේ සිටි ජාතික ජන බලවේගය දැඩිව විරුද්ධ විය.
කෙසේ නමුත් තවදුරටත් ජනතා බදු මුදල් විනාශ කරමින් දිගින් දිගටම පාඩු ලබන ආයතන සිය ගනනක් පවා නඩත්තු කරගෙන යෑමේ තිරණය තුළ වත්මන් ආණ්ඩුව සිටී.
