වත්මන් මැතිවරණ පනත යටතේ විදෙස්ගත ශ්‍රී ලාංකිකයන්ට ඡන්දය ප්‍රකාශ කිරීම සඳහා ක්‍රමවේද හෝ ඒ සඳහා නීති සකස් වී නැහැ.
එසේවුවද ඉන්දියාව, බංග්ලාදේශය, පිලිපීනය වැනි බොහෝ ආසියාතික රටවල් සිය විදේශගත පුරවැසියන්ට ඡන්දය ප්‍රකාශ කිරීමට හැකි වන පරිදි නීතිමය ක්‍රමෝපායයන් සකස් කර තිබෙනවා.
ශ්‍රී ලාංකිකයන් වෙනුවෙන් ද ඒ ආකාරයේ නීතිමය සංශෝධන සිදුකිරීම කාලීන අවශ්‍යතාවක් බවට හඳුනා ගෙන ඇති බැවින් මෙම පියවර ගත් බවයි රජය පවසන්නේ.
ඒ අනුව පවතින නීති සංශෝධනය කිරීමට හෝ නව නීති සකස් කිරීමටයි රජය සූදානම් වන්නේ.
මේ සඳහා වන නීතිරීති පිළිබඳ කරුණු අධ්‍යයනය කිරීම සඳහා මැතිවරණ කොමිෂන් සභාව, විදේශ කටයුතු, විදේශ රැකියා සහ සංචාරක අමාත්‍යාංශය, රාජ්‍ය පරිපාලන, පළාත් සභා සහ පළාත් පාලන අමාත්‍යාංශය සහ අනෙකුත් අදාළ අමාත්‍යාංශවල සහ ආයතනවල නිලධාරින්ගෙන් සමන්විත කමිටුවක් පත් කිරීමටයි නියමිතයි.
මේ පිළිබඳ පියවර ගැනීම සඳහා රාජ්‍ය පරිපාලන, පළාත් සභා හා පළාත් පාලන අමාත්‍යවරයා විසින් ඉදිරිපත් කරන ලද යෝජනාවට අමාත්‍ය මණ්ඩලයේ අනුමැතිය ලබා දී තිබෙනවා.
ආණ්ඩුක්‍රම ව්‍යවස්ථාවට අනුව, ජනතාවට ඇති පරමාධිපත්‍ය බලය ජනතාව විසින් ක්‍රියාත්මක කිරීමට අවස්ථාව ඇත්තේ ඡන්දයකදීයි.
ඡන්ද බලය, මැතිවරණ නීතිය අනුව ශ්‍රී ලංකාව තුළ වාසය කරන සහ මැතිවරණ නාමලේඛනයේ නම ලියාපදිංචි වී ඇති පුරවැසියන්ට පමණක් සීමා වී තිබෙනවා.
