පාර්ලිමේන්තුවේ කථානායකවරයාට මෙම වරප්‍රසාද ප්‍රශ්නය යොමු කරමින් දයාසිරි ජයසේකර මන්ත්‍රීවරයා කියා සිටියේ මේ හේතුව නිසා පාර්ලිමේන්තුවේ සියලුම ජනතා නියෝජිතයින්ගේ වරප්‍රසාද උල්ලංඝණය වී ඇති බවයි.
එම නිසා කඩිනමින් මේ ගැන අවධානය යොමු කරන ලෙසට ද ඔහු ඉල්ලා සිටියා.
1953 අංක 21 දරණ පාර්ලිමේන්තු බලතල හා වරප්‍රසාද පනත ප්‍රකාරව සකස්කොට 2018 මාර්තු 07 වන දින සම්මත කරනලද පාර්ලිමේනතු මන්ත්‍රිවරුන් සඳහා වන චර්යාධර්ම සංග්‍රහයේ vi වන කොටසේ 14-22දක්වා වන මන්ත්‍රිවරුන්ගේ මූල්‍ය බැදීම ලේඛනය උපුටාදක්වමින් දයාසිරි ජයසේකර මන්ත්‍රිවරයා විසින් මෙම වරප්‍රසාද ප්‍රශ්නය අසනු ලැබුවා.
ඒ අනුව එහි වරප්‍රසාද කඩකිරීම සම්බන්ධයෙන් මෙම වරප්‍රසාද ප්‍රශ්නය මතුකරන බවයි මන්ත්‍රිවරයා පෙන්වා දුන්නේ.
උක්ත චර්යාධර්ම අනුව වර්තමාන පාර්ලිමේන්තුවේ සියළුම මන්ත්‍රිවරුන් විසින් ඉදිරිපත් කරන ලද වත්කම් හා බැරකම් ප්‍රකාශ අල්ලස් හෝ දූෂණ චෝදනා විමර්ෂණ කොමිෂන් සභාව විසින් මේ වන විට ඵහි වෙබ් අඩවියේ පළකර තිබෙන බවද මන්ත්‍රිවරයා සඳහන් කරනවා.
ඒ අනුව වෙළඳ හා වානිජ කටයුතු පිළිබඳ අමාත්‍ය වසන්ත සමරසිංහ සතුව තිබෙන ක්‍රිප්ටෝ මුදල් 3000ක් තිබෙන බව සඳහන් කර තිබෙන බවත් ජගත් වික්‍රමරත්න කථානායකවරයා සතුව බයිනෑන්ස් ගිණුමේ USDT 1850ක් පවතින බව සඳහන්කර තිබෙන බවද දයාසිරි ජයසේකර මන්ත්‍රිවරයා පෙන්වා දෙනවා.
ඒ අනුව මෙවැනි කාරණා මහබැංකු අධිපතිවරයා විසින් මුදල් විශුද්ධිකරණය යටතේ වරදක් බව සඳහන් කර තිබෙන බවත් මෙම මුදල් ක්‍රෙඩිට් හෝ ඩෙබිට් කාඩ් මගින් හෝ උන්ඩියල් ක්‍රමයට ලබාගත්තේද යන්න පාර්ලිමේන්තුවට ඉදිරිපත් කළ යුතු බවද දයාසිරි ජයසේකර මන්ත්‍රිවරයා සඳහන් කරනවා.
දයාසිරි ජයසේකර මන්ත්‍රිවරයා මෙම වරප්‍රසාද ප්‍රශ්නය ඉදිරිපත් කරනවිට මුලාසනයේ සිටියේ නියෝජ්‍ය කථානායක රිස්වි සාලි.
දයාසිරි ජයසේකර මන්ත්‍රිවරයා විසින් මෙම වරප්‍රසාද ප්‍රශ්නය යොමුකරන අවස්ථාවේදී ආණ්ඩු පක්ෂයේ හා විපක්ෂයේ මන්ත්‍රිවරුන් අතර යම් උණුසුම් කතාබහක්ද ඇතිවුණා.
-hiru news
