එම සංගම් නියෝජිතයෝ මෙලෙස ඉවත් වී ඇත්තේ පසුගිය වසරේ දී ස්ථාන මාරු කරන ලද ගුරුවරුන් තුන්සිය දෙනකුට වැඩි පිරිසක් ප්රධාන පෙළේ ජාතික පාසල්වල තවදුරටත් රැඳී සිටීමට විරෝධය පළ කරමිනි. මෙම ක්රියාමාර්ගයත් සමග ලබන වසරට අදාළ ගුරුමාරු ක්රියාවලිය නතර වී ඇත.
ස්ථාන මාරු සඳහා විධිමත් ක්රමවේදයක් ක්රියාත්මක කරන තෙක් මාරු මණ්ඩලවලට නොපැමිණෙන බව ගුරු හා විදුහල්පති වෘත්තිය සමිති සන්ධානය විසින් අධ්යාපන හා උසස් අධ්යාපන අමාත්යාංශ ලේකම් නාලක කලුවැවට ඊයේ (02 වැනිදා) දැනුම් දී තිබේ.
ලංකා ගුරු සංගමය, ලංකා ගුරුසේවා සංගමය, සමස්ත ලංකා එක්සත් ගුරු සංගමය සහ ජාතික විදුහල්පති සංගමය ඇතුළු වෘත්තිය සංගම් කිහිපයකම නියෝජිතයෝ මෙම සාකච්ඡාවට එක්ව සිටියහ.
ස්ථාන මාරු කළ ගුරුවරුන් නිසා පිට පළාත්වල සිට එම පාසල්වලට පැමිණීමට අපේක්ෂාවෙන් සිටින ගුරුවරුන් ද දැඩි අපහසුතාවට පත්ව සිටින බව එම වෘත්තිය සමිති සන්ධානයේ කැඳවුම්කරු ජෝශප් ස්ටාලින් පැවසීය.
ස්ථාන මාරු භාර නොගැනීමට අදාළව ඉදිරිපත් කළ අභියාචනා මාරු මණ්ඩලවලින් ප්රතික්ෂේප වීමෙන් පසු ඇතැම් ගුරුවරුන් තවදුරටත් එම පාසලේම රැඳී සිටීමේ අරමුණින් රාජ්ය සේවා කොමිෂන් සභාවට අභියාචනා ඉදිරිපත් කර ඇති බවත් එම අභියාචනා සම්බන්ධයෙන් රාජ්ය සේවා කොමිෂන් සභාව ද මෙතෙක් තීන්දු ලබා දී නොමැති බවත් හෙතෙම කීවේය.
සියලු ගුරුවරුන්ට එක හා සමාන ක්රමවේදයක් ක්රියාත්මක වීය යුතු යැයි ද කැඳවුම්කරු ප්රකාශ කළේය.
