වැටුප් වැඩිකිරීම් ඇතුළු ඉල්ලීම් කිහිපයක් මුල්කරගනිමින් දුම්රිය ශ්‍රේණිගත වෘත්තීය සමිති එකමුතව ඊයේ මධ්‍යම රාත්‍රීයේ සිට අඛණ්ඩ වැඩ වර්ජනයක් ආරම්භ කර ඇත.
දුම්රිය ශ්‍රේණි හතරකට ඇති වී තිබෙනා වැටුප් විෂමතාවයන් විසඳන ලෙසට බලධාරීන්ගෙන් කළ ඉල්ලීමට මෙතෙක් ප්‍රතිචාර ලැබී නොමැති නිසා ඊයේ රාත්‍රී 12 සිට ආරම්භ කල වර්ජනය සිය ගැටලුවලට නිශ්චිත විසඳුම් ලැබෙන තුරු වර්ජනය අඛණ්ඩව සිදුකරන බව එහි කැඳවුම්කරු ජානක ප්‍රනාන්දු මහතා කියා සිටියේ ය.
කෙසේ වෙතත් සේවකයින් රාජකාරී සඳහා වාර්තා කරන ආකාරයට දුම්රිය ධාවන කටයුතු සිදුකරන බව දුම්රිය ගමනාගමන අධිකාරී එල්.ඒ.ආර්.රත්නායක මහතා සඳහන් කළේය.
මේ අතර දුම්රිය සේවක වර්ජනය හේතුවෙන් මගීන්ට සිදුවන අපහසුතාව මගහරවා ගැනීම සඳහා ලංකා ගමනාගමන මණ්ඩලය විශේෂ බස් රථ සේවාවක් ක්‍රියාත්මක කර තිබේ.
එහි මෙහෙයුම් අධිකාරී එච්.එම්.චන්ද්‍රසිරි මහතා කියා සිටියේ ප්‍රධාන දුම්රිය ස්ථාන මූලික කරගනිමින් මෙම බස් රථ සේවාව ක්‍රියාත්මක කරන බවයි.
