එම ඉල්ලා අස්‌වීම නිසා පුරප්පාඩු වූ ජාතික ලැයිස්‌තු මන්ත්‍රී ධුරය සඳහා නැගෙනහිර පළාත් සභා මන්ත්‍රී අමීර් අලි මහතාගේ නම මැතිවරණ කොමසාරිස්‌වරයා වෙත යෝජනා කිරීමට එක්සත් ජනතා නිදහස්‌ සන්ධානය තීරණය කර ඇත.
කර්මාන්ත සහ වාණිජ කටයුතු ඇමැති රිෂාඩ් බදියුදීන් මහතා නායකත්වය දරන සමස්‌ත ලංකා මහජන කොංග්‍රසය නියෝජනය කරමින් නැඟෙනහිර පළාත් සභාවේ කටයුතු කරමින් සිට පසුගියදා එම සන්ධානයෙන් ඉවත් වූ මන්ත්‍රීවරුන් තිදෙනා අතර අමීර් අලි මහතා ද සිටී.
හිටපු පාර්ලිමේන්තු මන්ත්‍රීවරයකු ද වන අමීර් අලි මහතා ජාතික ලැයිස්‌තුවෙන් මෙසේ පාර්ලිමේන්තුවට ඉදිරිපත් කිරීමත් සමඟ නැඟෙනහිර පළාත් සභාවේ මන්ත්‍රී ධුරයක්‌ ද පුරප්පාඩු වනු ඇත.
ජාතික ලැයිස්‌තු මන්ත්‍රී ධුරයෙන් ඉල්ලා අස්‌ වූ අස්‌වර් මහතා ආණ්ඩු පක්ෂයේ පසුපෙළ මන්ත්‍රීවරයකු ලෙස කටයුතු කරමින් පාර්ලිමේන්තු රැස්‌වීම්වලදී නිතර නිතර විපක්‍ෂයට බාධා කරන මන්ත්‍රීවරයකු ලෙස ද ප්‍රසිද්ධය.
අස්‌වර් මහතා ඊයේ තමන්ට සිය ඉල්ලා අස්‌වීමේ ලිපිය භාරදුන් බව පාර්ලිමේන්තුවේ මහ ලේකම් ධම්මික දසනායක මහතා ද තහවුරු කළේය.
