අද අනුරාධපුරයේ, පොළොන්නරුවේ ත්‍රිකුණාමලයේ ඇතිවී තිබෙන ගංවතුර තර්ජන වලදී විපතට පත් අයට උපකාර කරන්නේ හමුදාව. ඒ අයගේ ජීවිත බේරාගන්නේ අද හමුදාවේ රණවිරුවන් යැයි ආරක්‍ෂක ලේකම් ගෝඨාභය රාජපක්‍ෂ මහතා ඊයේ (22 වැනිදා) කතරගම වැඩිහිටිකන්ද රාජමහා විහාරයේ පැවැති උත්සවයේදී පැවැසීය.
මෙහිදී වැඩිදුරටත් අදහස්‌ දැක්‌වූ ආරක්‍ෂක ලේකම් ගෝඨාභය රාජපක්‍ෂ මහතා,
යුද්ධය අවසන් කරලා දැම්මත් රටේ ජාතික ආරක්‍ෂාව සඳහා යුද හමුදාවේ රැකවරණය රටට අවශ්‍යයි. මුදාගත් උතුරු නැගෙනහිර ප්‍රදේශයේ ආරක්‍ෂාව සඳහා තවමත් හමුදා කඳවුරු රැසක් පවතිනවා. රටක ජාතික ව්‍යසනයකදී උපකාර කරන්නේ හමුදාව.
පොළොන්නරුවේ පාසල් 14 ක් යුද හමුදාව මගින් ඉදිකර තිබෙනවා. මේ මගින් විශාල වියදමක්‌ රජයට ඉතිරි කිරීමට හැකි වුණා. පසුගිය යුද්ධයෙන් පස්‌සේ නාවික හමුදාවට 10,000 ක් බඳවා ගත්තා. මේ අය අතර මේසන් බාස්‌ලා, විදුලි කාර්මිකයන්, වඩු කාර්මිකයන් ඇතුළත් වෙනවා. මේ අය රටේ සංවර්ධනයට එක්‌වී රට ගොඩනගන්න උපකාර කරනවා. යුද්ධයෙන් පස්‌සේ යුද හමුදාවට 25,000 ක් බඳවා ගත්තා. විවිධ විදේශීය බලවේගයන් අපේ හමුදාවට එරෙහිව කුමන්ත්‍රණ කරනවා.
යුද්ධයෙන් පස්‌සේ වසර 30 ක් පුරා යුද මානසික තත්ත්වයෙන් පසුවූ අපේ හමුදාවන් මගින් රටේ සංවර්ධනයෙන් තොරව තිබුණු විහාරස්‌ථාන සංවර්ධනය කරමින් පවතිනවා. මේ මගින් හමුදාවේ අයගේ මානසික සුවය ඇති කරනවා. විශේෂයෙන් උතුරු නැගෙනහිර තිබුණු පන්සල් 600 ක් පමණ මේ වන විට සංවර්ධනය කර තිබෙනවා.
රටේම ගත් විට 5000 ක් පමණ විහාරස්‌ථානවල තිබුණු අඩුපාඩු නාවික හමුදාව, යුද හමුදාව ගුවන් හමුදාව, සිවිල් ආරක්‍ෂක භටයන් විසින් සම්පූර්ණ කර තිබෙනවා. අපෙන් බොහෝ පිරිසක්‌ ඇහැව්වා දැන් යුද්ධය ඉවරයි, ඇයි මේ තරම් හමුදාවක්‌ තියන් ඉන්නේ අඩු කරන්න කියලා. සිවිල් ආරක්‍ෂක අංශයත් ඉවත් කරන්න කියලා සමහරු කිව්වා. නමුත් ජනාධිපති කිව්වා යුද්ධය ජයග්‍රහණයට කැපවූ කිසිදු අයකු ඉවත් නොකරන ලෙස. අද මෙම පිරිස්‌ ජාතිය ගොඩනැගීම පිණිස විශාල දායකත්වයක්‌ ලබාදෙනවා.
මේ අතර විහාරස්‌ථානවල හිමිවරුන් අපේ රටේ පවතින විහාරස්‌ථානවල අඩුපාඩු මට පැවසුවා. ඒ අනුව උතුරු නැගෙනහිර ප්‍රදේශයේ යුද්ධයෙන් විනාශ වූ කෝවිල් පල්ලි බෞද්ධ සිද්ධස්‌ථාන නැවත සංවර්ධනය කර රටට දායාද කිරීමට රණවිරුවන් ක්‍රියා කළා. මේ සඳහා පුරාවිද්‍යා දෙපාර්තමේන්තුව ආරක්‍ෂක අමාත්‍යාංශයට ලබාදෙන උපදෙස්‌ මත මෙම ක්‍රියාවන් සිදු කරමින් පවතිනවා.
ඩෙංගු වසංගතය මගින් ජනතාව බේරා ගන්න මූලිකව ක්‍රියා කළේ හමුදාව. මෙයට අමතරව නාය යැම් වැනි ව්‍යසනයන්හිදී හමුදාවේ දායකත්වය ඉතාම ඉහළින් ලැබුණා. යුද්ධයෙන් පස්‌සේ අපි හමුදාව රටේ ජාතික අවශ්‍යතාවන් සඳහා පමණයි. යොදවනු ලැබුවේ. අනුරාධපුරේ සඳහිරු සෑය විශාල ව්‍යාපෘතියක්‌. මෙයට පූර්ණ සහය දුන්නේ රණවිරුවන්. මෙය හැර ත්‍රිවිධ හමුදාව වෙනත් කිසිදු දෙයකට යොමු කිරීමට ආරක්‍ෂක අමාත්‍යාංශය ක්‍රියාකාර නැහැ. රටේ ජාතික ආරක්‍ෂාව පිණිස සිටින හමුදාවෙන් වැඩි පිරිසක්‌ යොදවා තිබෙනවා. ඉතුරු අය තමයි ජාතිය ගොඩනැගීම සඳහා යොදවා ඇත්තේ.
