ව්‍යාපාරිකයන්ට සහ ධනවත් පුද්ගලයන්ට තර්ජනය කිරීම සඳහා මෙම සංවිධානාත්මක කල්ලිය යොදාගත් ජංගම දුරකථන දෙකක්‌ සහ සිම් කාඩ්පත් පහක්‌ද මහර බන්ධනාගාරයේ සිර මැදිරියක සඟවා තිබියදී පොලිසිය විසින් සොයාගෙන තිබේ.
පාතාල ලෝකයේ අපරාධකරුවන් සහ පොලිසියෙන් බව කියමින් තමන්ගෙන් රුපියල් ලක්‍ෂ ගණනින් කප්පම් මුදල් ඉල්ලන බවට කොළඹ හ අවට ප්‍රදේශවල පදිංචි ධනවත් පුද්ගලයන් පහළොස්‌ දෙනෙකුගෙන් කොළඹ අපරාධ කොට්‌ඨාසය වෙත පැමිණිලි ලැබී ඇත.
ව්‍යාපාරිකයන්ට ඇමැතුම් ලබාදුන් දුරකථන අංක ඔස්‌සේ පරීක්‍ෂණ පැවැත්වූ පොලිසිය එම ඇමතුම් ලැබෙන්නේ මහර බන්ධනාගාරයෙන් බව හෙළිකර ගෙන ඇත.
ඒ අනුව පොලිසිය සිදු කළ පරීක්‍ෂණවලදී මෙම සංවිධානාත්මක කල්ලියට සම්බන්ධ කාන්තාවක අත්අඩංගුවට ගැනීමට සමත් විය.
ධනවත් පුද්ගලයන්ට තර්ජනය කර ඔවුන් ලවා බැංකු ගිණුම් වල තැන්පත් කර ගන්නා මුදල් මහර බන්ධනාගාරයේ සිටින අපරාධකරුවන් ගෙන්වා ගන්නේ මෙම කාන්තාවගේ මාර්ගයෙන් බව පරීක්‍ෂණවලදී අනාවරණය වී තිබේ.
සැකකාර කාන්තාවගෙන් අපරාධ කොට්‌ඨාසය දීර්ඝ ලෙස ප්‍රශ්න කරගෙන යන අතර මෙම කප්පම් කල්ලියට සම්බන්ධ මහර බන්ධනාගාරයේ රඳවා සිටින අපරාධකරුවන් ද නීතියේ රැහැනට නතුකර ගැනීමට නියමිතය.
පොලිසියෙන් සහ පාතාල කල්ලිවලින් බව කියමින් රටපුරා ව්‍යාපාරිකයන්ට, ධනවත් පුද්ගලයන්ට දුරකථනයෙන් තර්ජනය කර රුපියල් ලක්‍ෂ ගණනින් කප්පම් මුදල් ලබා ගන්නා මහර බන්ධනාගාරයේ රඳවා සිටින අපරාධකරුවන් පිරිසක්‌ පිළිබඳ තොරතුරු හෙළිකරගත් කොළඹ අපරාධ කොට්‌ඨාසය ඊට සම්බන්ධ කාන්තාවක්‌ද අත්අඩංගුවට ගෙන ඇත.
Leave a comment
