කුඩු මුදලාලිලා, ළමා අපචාරකයන්, ස්‌ත්‍රී දූෂකයන්, වංචනිකයන් නීතිය හමුවට ගෙන ඒම සැබෑ යහපාලනය බවත් තම පියාගේ ඝාතනය සම්බන්ධයෙන් යුක්‌තිය ඉටු වන තුරු රටේ ජනතාව බලා සිටින බවත් ඇය සඳහන් කළාය.
අවුරුදු 3 ක් තිස්‌සේ නඩු කියලා කරන්න බැරි වුණු ඒ දෙය මේ වසරේදී ඉටු කර තම පියාගේ ඝාතකයන් නීතියේ ආධිපත්‍යයට යටත් කිරීම තම අභිලාෂය බවත් ඇය කීවාය.
කොළොන්නාව භාරත ලක්‍ෂමන් පිළිරුව අභියස පැවැති සමරු උළෙලේදී හිරුණිකා ප්‍රේමචන්ද්‍ර මෙනවිය මෙම අදහස්‌ පළ කළාය.
ඉකුත් 2011වසරේ ඔක්තෝබර් මස 08වැනි දින වෙඩිප‍්‍රහාරයකට ලක්ව ජිවිතක්‍ෂයට පත්වු හිටපු පාර්ලිමේන්තු මන්ත‍්‍රී අභාවප‍්‍රාප්ත භාරත ලක්‍ෂමන් පේ‍්‍රමචන්ද්‍ර මහතාගේ 59වැනි ජන්ම දින සැමරුම් උත්සවය ජනාධිපති මෛත‍්‍රීපාල සිරිසේන මහතාගේ ප‍්‍රධානත්වයෙන් කොළොන්නාව තෙල් සංස්ථාව ඉදිරිපිට ඉදිකර ඇති භාරත ලක්‍ෂමන් පේ‍්‍රමචන්ද්‍ර මහතාගේ පිළිරුව ඉදිරිපිටදි ඊයේ පැවැත්විණි.
මෙම අවස්ථාවට පේ‍්‍රමචන්ද්‍ර මහතාගේ බිරිඳ වන සුමනා පේ‍්‍රමචන්ද්‍ර මහත්මිය සහ දියණිය වන හිරුණිකා පේ‍්‍රමචන්ද්‍ර මෙනෙවිය ද සහභාගි වී සිටි අතර ජනාධිපති මෛත‍්‍රීපාල සිරිසේන මහතා විසින් භාරත ලක්‍ෂමන් ප්‍රේමචන්ද්‍ර මහතාගේ පිළිරුවට පුෂ්පෝපහාර දැක්වීය.
