මේ තරගයෙන් හැව්ලොක්ස් ක්‍රීඩා සමාජය ලකුණු 18-10ක ජයක් වාර්තා කළ අතර තරගයේ අගභාගයේ දී නාවික හමුදාවට ක්‍රීඩා කළ විදේශ ක්‍රීඩකයකු නීතිවිරෝධි ක්‍රීඩා රටාවක නිරතවීම හේතුවෙන් පිටියෙන් ඉවත් කිරීමට තරග තීරකවරයා පියවර ගැනීමත් සමග ගැටුම්කාරී තත්ත්වයක් උද්ගත වූ බවත්, පසුව තරග තීරකවරයකු ලෙස කටයුතු කළ මහේෂ් සේනානායක මහතා ඇතුළු දෙදෙනකුට කළ පහරදීමකින් ඔවුන් සුලු තුවාල ලැබූ බවත් ඊයේ පුවත්පත් වාර්තා කර තිබිණි.
මෙහිදී හැව්ලොක්ස් ක්‍රීඩා සමාජයේ ක්‍රීඩකයන් දැඩි ආරක්ෂාව මැද වැලිසර නාවික හමුදා කඳවුරු භූමියෙන් ඉවත්කර තිබේ. මේ පිළිබඳ තරග තීරකවරුන්ගෙන් හා ක්‍රීඩකයන්ගෙන් තොරතුරු විමසීමට බලාපොරොත්තු වන බව සඳහන් කළ ශ්‍රි ලංකා රගර් සංගමයේ ලේකම්වරයා ඉදිරි දින කිහිපය තුල දී රගර් සංගමයේ විනය කමිටුව මගින් මේ ගැටුම පිළිබඳ විශේෂ පරීක්ෂණයක් සිදුකිරීමට නියමිත බව කියා සිටියේය.
