ආදරේ මෙහෙම දෙයක් ඒක ඇති වෙන්නෙ මෙහෙමයි කියල පැහැදිලිව කියන්න කාටවත් බැරි උනත් ආදරේ දැනෙන ආදරේ පෙනන අවස්ථාවලට උදාහරණ නම් ඕනෑතරම් ලෝකයේ පවතිනවා.
ටූරියා පිට් නිරූපිකාවක් වගේම මළල ක්‍රීඩිකාවක්. මීට වසර හතරකට පෙර ඕස්ට්‍රේලියාවේ පැවැත්වුණු මැරතන් ධාවන තරඟයකට සහභාගී වී සිටින ටූරියා ලැව් ගින්නකට මැදිවෙනවා.
එම ගින්නෙන් ටූරියාගේ සිරුරේ හතරෙන් තුනක්ම පිළිස්සෙනවා. තමන්ගෙ ජීවිතය විනාශ කරමින් ඇවිලුණු ගින්නෙන් ජීවිතයත් මරණයත් අතර සටනකට මුහුණ දෙන ටූරියාට නව බලාපොරොත්තුවක් ගෙන එන්නේ මයිකල් හොස්කින්.
දැඩි සත්කාර ඒකකයේ ප්‍රතිකාර ලබන ටූරියා වෙත එන මයිකල් මුදුවක් පළඳවමින් තම ප්‍රේම ආරාධනාව ඇය වෙත ඉදිරිපත් කරනවා. ඔවුන්ගේ ප්‍රේමයට වසර හතරක් ගත වෙලා.
ඔවුන් දැන් ලෑස්තිවෙන්නෙ විවාහ වෙන්න. පසුගියදා ටූරියා සහ මයිකල් තමන්ගෙ විවාහ ගිවිසගැනීම ප්‍රකාශයට පත් කරා.
දැනට සමාජ සේවිකාවක් ලෙස රැකියාව කරන ටූරියා පෙන්වූ ධෛර්ය හේතුවෙන් ඇය ඕස්ට්‍රේලියාව තුල පමණක් ඇගයීම් රාශියකට ලක් වෙලා තියෙනවා. ඇගේ ධෛර්ය පිටුපස සිටින්නේ ආදරය බව පවසන ටූරියා නව ජීවිතය පිළිබඳ සිහින දකිමින් සිටිනවා.
ඇත්ත ආදරය මිනිස්සුන්ට ධෛර්ය වගේම ජීවිතයත් දෙනවා.
