අග්‍රාමාත්‍යවරයා මෙම උපදෙස් ලබා දී ඇත්තේ විශ්වවිද්‍යාලවල අවශ්‍ය යටිතල පහසුකම් සම්බන්ධයෙන් විශ්වවිද්‍යාල ප්‍රතිපාදන කොමිෂන් සභාව සහ සියලු ම විශ්වවිද්‍යාල උපකුලපතිවරුන් සමඟ අරලියගහ මන්දිරයේ පැවැති සාකච්ඡාවට එක්වෙමිනි.
මේ වසරේ දී විශ්වවිද්‍යාල සඳහා දරුවන් 41000ක් බඳවාගෙන ඇතැයි පෙන්වා දුන් විශ්වවිද්‍යාල ප්‍රතිපාදන කොමිෂන් සභාවේ සභාපති ජ්‍යේෂ්ඨ මහාචාර්ය සම්පත් අමරතුංග , සිසුන් 10 588ක් පමණ මෙවර විශ්වවිද්‍යාල සඳහා වැඩිපුර බඳවා ගෙන ඇත්තේ නිදහසෙන් පසු පළමු වතාවට බව අනාවරණය කළේ ය.
ඒ අනුව වෛද්‍ය පීඨවලට පමණක් වැඩිපුර සිසුන් 479ක් බඳවා ගෙන ඇති බව කී ජ්‍යෙෂ්ඨ මහාචාර්ය සම්පත් අමරතුංග එය අලුතින් වෛද්‍ය පීඨ 4ක් ආරම්භ කිරීමට සමාන යැයි ද පෙන්වා දුන්නේ ය.
එහෙත් මේ සියල්ල කළමනාකරණය කිරීමට හැකිවූයේ සියලු විශ්වවිද්‍යාලවල උපකුලපතිවරුන්ගෙන් ඊට ලැබුණු සහාය නිසා බව සිහිපත් කළ මහාචාර්ය සම්පත් අමරතුංග මහතා රුපියල් බිලියන 5ක පමණ අමතර මුදලක් විශ්වවිද්‍යාල පද්ධතියේ භෞතික හා මානව සම්පත් කළමනාකරණයට අවශ්‍ය බව ද පෙන්වා දුන්නේ ය.
විශ්වවිද්‍යාල දරුවන්ගේ අධ්‍යාපනය වෙනුවෙන් දැනට ලබාදෙන මුදල් ප්‍රතිපාදනවලට අමතරව මෙම අතිරේක මුදල් පියවරෙන් පියවර අදියර කිහිපයකින් විශ්වවිද්‍යාල පද්ධතියට මුදාහරින්නැයි උපදෙස් දුන් අග්‍රාමාත්‍යවරයා , ඒ සම්බන්ධ ක්‍රමවේදය මහා භාණ්ඩාගාරය සහ විශ්වවිද්‍යාල ප්‍රතිපාදන කොමිෂන් සභාව එක්ව සාකච්ඡා කර තීන්දු කරගන්නැයි ද දන්වා ඇත .
මේ අතර අධ්‍යාපන අමාත්‍ය මහාචාර්ය ජී.එල් පීරිස් මහතා ඉසෙඩ් අගය මත විශ්වවිද්‍යාල ප්‍රවේශය ලබා ගැනීමට නොහැකි වූ විශිෂ්ට සාමාර්ථ ලබාගත් දරුවන් වෙනුවෙන් යම් වැඩපිළිවෙළක් ක්‍රියාත්ම කළ යුතු බව පෙන්වා දී ඇත.
ඊට විසඳුමක් ලෙස රජය ප්‍රතිපාදන ලබා දෙන්නේ නම් කොතලාවල ආරක්ෂක විශ්වවිද්‍යාලයට එම දරුවන් බඳවා ගැනීමේ හැකියාව ඇතැයි කොතලාවල ආරක්ෂක විශ්වවිද්‍යලයේ උප කුලපති මේජර් ජෙනරාල් මිලින්ද පීරිස් පෙන්වා දුන්නේ ය. ඊට අදාළව අමාත්‍ය මණ්ඩල සංදේශයක් ඉදිරිපත් කරන ලෙස ද අග්‍රාමාත්‍යවරයා අධ්‍යාපන අමාත්‍ය මහාචාර්ය ජී.එල් පීරිස්ට උපදෙස් දී තිබේ.
-පංචාලි අබේසේකර
