තෙල් ගැටලුව විසැඳීම සඳහා රජය උපාය මාර්ග කිහිපයක් ගෙන තිබේ. එක උපාය මාර්ගයක් වන්නේ ඇතැම් තෙල් සමාගම් සඳහා ගෙවීමට ඇති ණය වහාම ගෙවා දැමීමට තීරණය කිරීමය. දෙවැන්න මව් සමාගම් සමඟ ඍජු සාකච්ඡා ඇති කර ගනිමින් ගිවිසුම් අලුත් කර ගැනීමට පියවර ගැනීමය. තෙවනුව අලුත් තෙල් සමාගම් සමඟින් නව ගිවිසුම් ඇති කර ගැනීමට උත්සාහ කිරීමය. රුසියාවෙන් තෙල් හා ගෑස් ලබා ගැනීම සඳහා සාකච්ඡා කිරීමට ද රජය කටයුතු කරගෙන යයි. ජනාධිපතිවරයාගේ උත්සාහය වන්නේ ඉන්ධන කටයුතු සඳහා අලුත් මාර්ග සිතියමක් සකස්කොට ඒ අනුව කටයුතු කිරීම බව ප්‍රකාශ වී ඇත.
මෙය අපට පමණක් බලපාන ගැටලුවක් ද නොවේ. පාකිස්තානය ආර්ථික අර්බුදයේ උපරිම අවස්ථාවට පැමිණ ඇති අතර ජාත්‍යන්තර මූල්‍ය අරමුදලෙන් ඩොලර් බිලියන 6.4ක් ඉල්ලා සිටී. මේ වන විට විසිදෙවතාවක් ජාත්‍යන්තර මූල්‍ය අරමුදලේ ණය ගෙන ඇති පාකිස්තානය ණය උගුලක හිර වී ඇතැයි ආර්ථික විශේෂඥයෝ පෙන්වා දෙති. මැලේසියාවේ, කැන‍ඩාවේ හා ඉරානයේ උද්ධමනය ශීඝ්‍ර ලෙසින් ඉහළ යන අතර ජනතාව නොසන්සුන් වී ඇත. ඉරානයේ විශ්‍රාමිකයෝ පවා විශ්‍රාම වැටුප් වැඩි කරන ලෙස ඉල්ලමින් පාරට බැස සිටිති. ලෝකයේ බොහෝ රාජ්‍යයන් දරුණු ආහාර අර්බුදයක් අබියස විස්මයෙන් බලා සිටී. කෙසේවෙතත් සිදු විය යුත්තේ යථාර්ථයට මුහුණ දෙමින් අර්බුදය ජය ගැනීම සඳහා සටන් කිරීම පමණි.
-මහේෂි
