කෙසේ නමුත් භූමිතෙල් සහනාධාර ක්‍රමයක් ක්‍රියාත්මක නොකර ඒ වෙනුවට මුදල්මය දීමනාවක් සහනාධාර අවශ්‍ය කණ්ඩායම් වෙත ලබාදීම වඩා නිවැරදි තීරණයක් ලෙස සැලකිය හැකිය. එමඟින් ඉන්ධන සහනාධාරයේ වාසිය අයුතු ලෙස අතපත් කරගැනීමට තිබෙන අවස්ථා අහෝසි වෙනු ඇත.
පසුගිය මාස කිහිපයෙහි පැවැති ඉන්ධන හිඟය සහ ඉන්ධන මිල ඉහළ යෑම නිසා ඩීසල් සහ පෙට්‍රල් සමඟ භූමි තෙල් මිශ්‍ර කිරීම බහුලව සිදු විය. ත්‍රීවීල්, බස් රථ සහ බෝට්‍ටු සඳහා භුමීතෙල් මිශ්‍රණයක් ලෙස යොදාගැනීම වැඩි වශයෙන් සිදුව තිබේ.
එමෙන්ම ගෑස් හිඟය නිසා භූමිතෙල් වලින් ඉවීමේ කටයුතු වලට මාරුවීමද දකින්නට ලැබිණි. මේ තත්වයන් නිසා මෙරට භුමීතෙල් පාරිභෝජනය වැඩි වී තිබිණි. දිනක අවශ්‍යතාවය මෙට්‍රික් ටොන් 500 ට වඩා අඩු මට්ටමක තිබුණු අතර පසුව එය මෙට්‍රික් ටොන් 600 ඉක්මවා ගියේය. මේ තත්වය මත භූමිතෙල් අඩු මිලක් යටතේ ලබා දීම මත තෙල් සංස්ථාව ඒ වෙනුවෙන් ලබන පාඩුව ඉහළ යෑමට හේතු වී තිබිණි.
මේ අතර ශ්‍රී ලංකා ඛනිජතෙල් නීතිගත සංස්ථාව පාඩු ලැබීම සඳහා එක් ප්‍රධාන හේතුවක් ලෙස අමාත්‍යවරයා ද සඳහන් කරන්නේ භූමි තෙල් සහන මිලට සැපයීම බවයි.
ඊයේ(21) මධ්‍යම රාත්‍රියේ සිට ක්‍රියාත්මක වන පරිදි ලංකා භූමිතෙල් ලීටරයක මිල රුපියල් 87ක මුදලේ සිට රුපියල් 340ක් දක්වා වැඩි කිරීමට ශ්‍රී ලංකා ඛනිජ තෙල් නීතිගත සංස්ථාව කටයුතු කර තිබේ.
ඒ අනුව භූමිතෙල් ලීටරයක මිල පැවති මිලට සාපේක්ෂව රුපියල් 253 ක මුදලකින් භුමිතෙල් මිල ඉහළ ගොස් ඇත.
