මෙම සුනඛයා පොමනේරියන් වර්ගයට අයත් බවයි සදහන් වන්නේ.
කිළිනොච්චිය පරන්තන් ප්‍රදේශයේ වැසියකු මුලින්ම කිළිනොච්චිය පොලිසියට පැමිණිල්ලක් ඉදිරිපත් කරමින් පවසා ඇත්තේ තම සුනඛයා අතුරුදන් වී ඇති බවයි. දින කිහිපයකට පසු මේ සුනඛයා ඔහුගේ නිවෙසට පැමිණ තිබේ. ඊට පසු දිනයේ කිළිනොච්චියේ තවත් පුද්ගලයකු පොලිසියට පැමිණ තමන්ගේ සුරතල් සුනඛයා වෙනත් පුද්ගලයකු විසින් බලහත්කාරයෙන් බැඳගෙන සිටින බවට පැමිණිල්ලක් කර තිබේ. පසුව දෙපාර්ශ්වයම පොලිසියට කැඳවා පැමිණිල්ල විභාග කළද ඔවුන් දෙදෙනා පොදු එකඟතාවකට පැමිණීමට අකැමැති වීම නිසා සුනඛයාගේ ගැටලුව අධිකරණයට යොමු කිරීමට පොලිසියට සිදු විය.
එහිදී සුනඛයාගේ මුල් අයිතිකරු බව කියන පුද්ගලයා අධිකරණය හමුවේ පවසා ඇත්තේ තමන් ඇති දැඩි කරන මේ සුනඛයාගේ මව කිළිනොච්චියේ වෙනත් ස්ථානයක සිටින බවයි. තමන් එම නිවෙසින් මේ සුනඛයා මිලදී ගත් බවද ඔහු අධිකරණයට ප්‍රකාශ කළේය.
ඒ අනුව සුනඛයාගේ නියම අයිතිකරු සොයා ගැනීමට සුනඛයා සම්බන්ධයෙන් ජානමය පරීක්ෂණයක් සිදුකොට එහි වාර්තාවක් අධිකරණයට ඉදිරිපත් කරන ලෙස කිළිනොච්චිය මහේස්ත්‍රාත්වරයා පොලිසියට නියෝග කළේය.
