බස්නාහිර, මධ්‍යම සහ සබරගමුව පළාත්වලට මෙන්ම ගාල්ල සහ මාතර දිස්ත්‍රික්කවල ඇතැම් ස්ථානවලට අද පස්වරු 2 න් පසු වැසි හෝ ගිගුරුම් සහිත වැසි ඇති විය හැකිය.

පොළොන්නරුව දිස්ත්‍රික් ආපදා කළමනාකාරණ නියෝජ්‍ය අධ්‍යක්ෂ රංජිත් අලහකෝන් සඳහන් කළේ, පරාක්‍රම සමුද්‍රයේ වාන් දොරටු වසා දැමූ බවයි.

කෙසේ නමුත් ජල ගැලීම් හේතුවෙන් පොළොන්නරුව – මඩකලපුව මාර්ගය ගල්ලෑල්ල ප්‍රදේශයෙන් තවදුරටත් වසා දමා තිබේ.

අධික වැසි හේතුවෙන් පසුගිය දිනවල ඇති වූ ගංවතුර හා නාය යෑම්වලින් දිස්ත්‍රික්ක කිහිපයක මේ වනවිට පීඩාවට පත්ව ඇති පුද්ගලයින් සංඛ්‍යාව 109,635 ක්ය.

වැඩිම බලපෑමක් එල්ල වී ඇත්තේ අම්පාර දිස්ත්‍රික්කයටයි.

එහි පවුල් 1198ක, පුද්ගලයින් 3773 දෙනෙකු අවතැන්ව ඇතැයි ආපදා කළමනාකරණ මධ්‍යස්ථානය පවසයි.

මේ අතර පවතින අධික වැසි හමුවේ දිස්ත්‍රික්ක 8 කට නිකුත් කළ නාය යෑමේ අනතුරු ඇඟවීමේ අද පස්වරුව දක්වා දීර්ඝ කෙරුණි.

බදුල්ල, ගාල්ල, මහනුවර, මාතලේ, මාතර, මොණරාගල, නුවරඑළිය සහ රත්නපුර දිස්ත්‍රික්කවල ප්‍රාදේශීය ලේකම් කොට්ඨාස රැසක් ඒ අතරට ඇතුළත් ය.

-P.M