ශ්‍රී ලංකා ආර්ථිකය යථා තත්ත්වයට පත් කිරීමට රජය ප්‍රමුඛ ජනාධිපති රනිල් වික්‍රමසිංහ මහතා ගනු ලබන පියවර මෙහිදී නියෝජ්‍ය රාජ්‍ය ලේකම්වරයා ගේ ඇගයීමට ලක් විය.
මෙහිදී කොළඹ වරායේ බටහිර බහාලුම් පර්යන්තය සංවර්ධනය කිරීම සඳහා පසුගිය වසරේදී ඩොලර් බිලියන භාගයක පමණ ආයෝජනයක් කළ එක්සත් ජනපදය ශ්‍රී ලංකාව සමඟ තවදුරටත් එවැනි මූල්‍ය සහයෝගීතාවක් සඳහා කැමැත්ත පළ කර ඇති බව ද වාර්තා වේ.
පසුගිය වසරේදී එක්සත් ජනපදය සිය ජාත්‍යන්තර සංවර්ධන මූල්‍ය සංස්ථාව (International Development Finance Corporation -DFC) හරහා Colombo West International Terminal Private Limited වෙත ඇමරිකානු ඩොලර් මිලියන 553 ක ණය මුදලක් ලබා දුන්නේය. ජාත්‍යන්තර සංවර්ධන මූල්‍යකරණයේදී චීනය සමඟ ඇති තරගකාරිත්වයට මුහුණ දීමට එක්සත් ජනපදය වත්මන් පරිපාලනය යටතේ මෙම DFC ආයතනය පිහිටුවන ලදී.
රිචඩ් වර්මා මහතා ශ්‍රී ලංකාවට පැමිණියේ ඉන්දු-පැසිෆික් හවුල්කරුවන් සමඟ එක්සත් ජනපද සහයෝගීතාව ශක්තිමත් කිරීමේ පියවරක් ලෙසය. ඒ සමඟම ඉන්දියාව සහ මාලදිවයින යන රාජ්‍යයන්හීද ඔහු සංචාරයක නිරත විය. 2022 පෙබරවාරි 11 වන දින එක්සත් ජනපද ඉන්දු-පැසිෆික් උපාය මාර්ගය දියත් කිරීමෙන් පසුව, නිදහස් හා විවෘත, සම්බන්ධිත, සමෘද්ධිමත්, ආරක්ෂිත සහ ඔරොත්තු දෙන ඉන්දු-පැසිෆික් කලාපයක් ගොඩනැගීමට එක්සත් ජනපදය මිත්‍ර පාක්ෂිකයින් සහ හවුල්කරුවන් සමඟ සහයෝගයෙන් කටයුතු කරයි.
ජනාධිපති රනිල් සමඟ පැවැති සාකච්ඡාවේදී කෘෂිකාර්මික නවීකරණ වැඩසටහන ඇතුළු ශ්‍රී ලංකාව තුළ මේ වන විට සිදු කෙරෙන ප්‍රධාන ආර්ථික ප්‍රතිසංස්කරණ සහ ණය ප්‍රතිව්‍යුහගත කිරීමේ ක්‍රියාවලියෙහි ප්‍රගතිය පිළිබඳව ජනාධිපතිවරයා මෙහිදී එක්සත් ජනපද නියෝජ්‍ය රාජ්‍ය ලේකම්වරයා දැනුවත් කළේය.
ගෝලීය ආරක්ෂාවට අදාළ කරුණු සම්බන්ධයෙන් ද මෙහිදී සාකච්ඡාවට ලක් වූ අතර රතු මුහුදේ සිදු කෙරෙන නාවික මෙහෙයුම් සඳහා ශ්‍රී ලංකා රජය ලබාදුන් සහය වෙනුවෙන් නියෝජ්‍ය රාජ්‍ය ලේකම්වරයා ජනාධිපති රනිල් වික්‍රමසිංහ මහතා වෙත ස්තූතිය පළ කර සිටියේය.
හුති කැරලිකරුවන් සම්බන්ධයෙන් සෞදි අරාබියේ ස්ථාවරත්වයට සහාය පළ කරමින් ඉන්දීය සාගරයේ නාවික ගමනාගමනයේ නිදහස වෙනුවෙන් ශ්‍රී ලංකාව තවදුරටත් කැපවී සිටින බව මෙහිදී ජනාධිපතිවරයා ප්‍රකාශ කළේය.
-P.M
