ජාත්‍යන්තර මූල්‍ය අරමුදලේ ශ්‍රී ලංකාව සඳහා වන විස්තීරණ අරමුදල් පහසුකම යටතේ 4 වන වගන්තිය උපදේශනය හා දෙවන සමාලෝචනය ලබන සතියේ සාකච්ඡාවට ගැනීමට නියමිතයි.
රාජ්‍ය අමාත්‍ය ෂෙහාන් සේමසිංහ පවසන්නේ ශ්‍රී ලංකාව පිළිබඳ සාකච්ඡාව එළඹෙන ජූනි 12 වැනිදා ජාත්‍යන්තර මූල්‍ය අරමුදල් රැස්වීම් න්‍යාය පත්‍රයට එක්කර ඇති බවයි.
එම සැසිවාරයේදී ශ්‍රී ලංකාවේ ආර්ථික ප්‍රතිපත්ති හා ප්‍රතිසංස්කරණ ප්‍රගතිය ඇගයීමට ලක් කරනු ඇති.
පසුගිය වසරේ දෙසැම්බරයේදී, ජාත්‍යන්තර මූල්‍ය අරමුදලේ විධායක මණ්ඩලය විසින් ශ්‍රී ලංකාවේ වැඩසටහන පිළිබඳ පළමු සමාලෝචනය අනුමත කරන ලද අතර, එමඟින් ඇමෙරිකා ඩොලර් මිලියන 337ක් ලබා ගැනීමට හැකි විය.
ආර්ථික ස්ථාවරත්වය, වර්ධනය හා ප්‍රතිසංස්කරණ ප්‍රයත්නයන් තවදුරටත් ඉහළ නංවන තුන්වන වාරිකය ලබාගැනීමට සාර්ථක සමාලෝචනයක් සඳහා සියලු රටවල අඛණ්ඩ සහයෝගය බලාපොරොත්තු වන බව රාජ්‍ය අමාත්‍යවරයා වැඩිදුරටත් පෙන්වා දුන්නේය.
