ජනාධිපති මහින්ද රාජපක්ෂ මහතා මෙම අදහස් පළ කළේ රත්නපුර දිස්ත්‍රික් විශේෂ සංවර්ධන කමිටු රැස්වීමට රත්නපුර ප්‍රාදේශීය ලේකම් කාර්යාලයේ ශ්‍රවණාගාරයේ දී ඊයේ (15) එක්වෙමිනි.
මහින්ද චින්තන ඉදිරි දැක්ම ප්‍රතිපත්තියට අනුකූලව 'රාජ්‍ය සේවය ජනතාව පිණිසයි' යන්න තහවුරු කරමින් ඉදිකරන ලද රත්නපුර ප්‍රාදේශීය ලේකම් කාර්යාලය ජනාධිපතිවරයාගේ අතින් මෙහිදී ජනතා අයිතියට පවර දෙනු ලැබිණි.
දේශපාලන වශයෙන් කිසිවකුගෙන්වත් පළිගැනීමට තමා සූදානම් නැති වුවත් දේශපාලන හේතු මත රටේ සංවර්ධනයේ වෙනස්කම් කිරීමට ඉඩ නොතබන බව ද ජනාධිපතිවරයා මෙහිදී අවධාරණය කළේය.
හිතුමතයට වැඩ නොකර ජනතාවට උපරිම ප්‍රයෝජන ලැබෙන අයුරින් දේශපාලන අධිකාරිය සහ රාජ්‍ය නිලධාරීන් එක්ව නිසි සැලසුම් ඔස්සේ ජාතික සංවර්ධන වැඩපිළිවෙළ ක්‍රියාවට නැංවීමේ අවශ්‍යතාව ද ජනාධිපතිවරයා පෙන්වා දුන්නේය.
මනාප දෙස බලාගෙන රට සංවර්ධනය කළ නොහැකි බව පෙන්වා දුන් ජනාධිපතිවරයා ඡන්ද නිසා නීතිය පහතට දමා කටයුතු කිරීමට ඉඩ දීමට තමා සූදානම් නොමැති බව පැවැසීය. ජනතාව දේශපාලනඥයන් වෙත ලබා දී තිබෙන වගකීම් නිසි ලෙස ඉටු කිරීමේ වැදගත්කම පෙන්වා දුන් ජනාධිපතිවරයා එසේ වූ විට නීතිය හරිහැටි ඉටු වන බව පැවැසීය.
