තීරු බදු රහිතව මිලිමීටර් අටේ තඹ කොයිල් ඩුබායි සිට මෙරටට ගෙන්වා ඒවා නැවත මිලිමීටර් තුනේ කම්බි බවට සකස්‌ කර ඉන්දියාවට යෑවීම සඳහා සන් ඉන්ටර්නැෂනල් සමාගම සහ ඒෂියා මෙටල් පුද්ගලික සමාගම යන සමාගම් දෙක විසින් තාවකාලික රේගු විශේෂ බලපත්‍ර ලබාගෙන තිබුණි. මෙම සමාගම් දෙකම දෙමළ ජාතිකයන්ට අයත් සමාගම් වන අතර ඒ දෙකේම හිමිකරුවන් වන්නේද එකම පිරිස්‌ය.
මේ සමාගම් දෙක විසින් තීරුබදු රහිතව මෙරටට ගෙන්වන තඹ කම්බි මෙරට සමාගමකට විකුණන බවට ලැබුණු පැමිණිලි මත රේගුව පරීක්ෂණ ආරම්භ කළ අතර එහිදී හෙළිවී ඇත්තේ මෙරට එක්‌තරා විදුලි වයර් නිෂ්පාදන සමාගමකට අදාළ තඹ කම්බි කන්ටේනර් 18 ක් විකුණා ඇති බවය. එයින් රටට අහිමිවූ බදු ආදායම රුපියල් මිලියන සියයකට අධික බව ගණන් බලා තිබේ. එහිදී වහාම ක්‍රියාත්මකවූ රේගු නිලධාරීන් අදාළ සමාගමට විකිණීමට උත්සහ කළ තවත් කන්ටේනර් දෙකක්‌ අත්අඩංගුවට ගන්නා ලදී.
මෙම කන්ටේනර් දෙක සම්බන්ධයෙන් නඩු විභාගයට අදාළ නියෝජ්‍ය ඇමැතිවරයා මන්ත්‍රීවරයකු ලෙස කටයුතු කළ අවස්‌ථාවේ පෙනී සිටි අතර ඔහු නියෝජ්‍ය ඇමැති ධුරය හිමිකර ගත් පසු එය නීති විරෝධී බැවින් ඔහු නඩුවෙන් ඉවත්විය.
ඉන් පසු ඔහු ශ්‍රී ලංකා රේගුවේ අදාළ පරීක්ෂණ කටයුතු සිදුකරන රේගු නිවාරණ ඒකකයේ කාර්යාලය වෙත පැමිණ එහි නිලධාරීන් වෙත පසුගිය සතියේ පැමිණ විවිධ බලපෑම් කරන්නට පටන්ගෙන තිබේ. ඔහු විවිධාකාර වලින් බලපෑම් කළ ද රේගු නිලධාරීන් අදාළ කන්ටේනර් දෙක නිදහස්‌ කිරීම හෝ පරීක්ෂණ කටයුතු නැවත්වීම ප්‍රතික්‌ෂේප කර තිබේ.
- දිවයින ඇසුරෙණි
