අමාත්‍යවරයා පෙන්වා දෙන්නේ විපක්ෂය වෙනුවෙන් ඊට හිටපු මුදල් අමාත්‍යවරයා සේම ජනාධිපතිවරයා ද වූ මහින්ද රාජපක්ෂ මහතා සහභාගී වන්නේ නම් වඩාත් යෝජ්‍ය බවයි.

එහෙත් රාජපක්ෂ මහතාට ජනතාව හමුවේ එවැනි විවාදයකට සහභාගී වීමේ සැකයක් හෝ අර්බුදයක් හෝ ඇත්නම් පැවැති ආණ්ඩුවේ ආර්ථිකයට අදාළ කිසිදු වගකිව යුතු අමාත්‍ය ධුරයක් නොදැරූ හිටපු අධ්‍යාපන අමාත්‍ය බන්ධුල ගුණවර්ධන මහතා සමග වුව විවාද කිරීමේ ගැටලුවක් නැති බව අමාත්‍යවරයා පෙන්වා දෙයි.

තොටළග ප්‍රදේශයේ නිවාස අහිමි වීමට යන පවුල්වල සාමාජියන් පිරිසක් සමග පැවැති හමුවකින් අනතුරුව පැවැති ජනහමුවක දී අමාත්‍යවරයා මේ බව කියා සිටියේ ය.

වැඩි දුරටත් අදහස් දැක් වූ අමාත්‍යවරයා කියා සිටියේ වසර 12ක් තිස්සේ ආණ්ඩුවේ හිතවතුන්ට පමණක් ලැබුණ ආර්ථික ප්‍රතිලාභ මේ වන විට සියලු ජනතාව වෙත ගලා යමින් තිබෙන බවයි.

පැවැති කොල්ලකාරී ආර්ථික රටාව සම්පූර්ණයෙන් වෙනස් කර ආණ්ඩුව ජනතාවාදී ආර්ථිකයක් නිර්මාණය කරමින් සිටින මොහොතේ ඊට අකුල් හෙළීම ඇතැමුන් සිය දේශපාලනය බවට පත් කරගෙන ඇති බව අමාත්‍යවරයා පෙන්වා දෙයි.

ජනවාරි මස 8 වැනි දා ජනතාව හමුවේ ප්‍රතික්ෂේප වූවන් මේ මොහොතේ කළ යුත්තේ ජන මතයට හිස නමමින් ආණ්ඩුවේ කටයුතුවලට බාධා නොකර සිටීම බවයි අමාත්‍යවරයා පවසන්නේ.

එහෙත් ජනතා මුදලින් තමන් ගත කරමින් සිටි සුපිරී ජීවිත අහිමි වීමෙන් වියරු වැටී සිටින මෙම පරාජිත කණ්ඩායම අද විපක්ෂයේ සිට ජනතාවගේ ජීවත අවුලට ඇද දැමීමට කටයුතු කරමින් සිටිති.

වසර දොළහක් තිස්සේ රටේ ආර්ථිකය බංකොලොත්භාවයට පත් කිරීමට කටයුතු කළා පමණක් නොව ආර්ථිකය එම තත්ත්වයෙන් මුදා ගන්නට වත්මන් ආණ්ඩුව කටයුතු කරන මොහොතේ ඊට ද අකුල් හෙළීම ද ඔවුන්ගේ අවශ්‍යතාව වී ඇතැයි අමාත්‍යවරයා වැඩි දුරටත් සඳහන් කළේය.