තොරතුරු දැන ගැනීමේ පනත හදිසි පනතක් ලෙස පාර්ලිමේන්තුවට ගෙන ඒමට කැබිනට් අනුමැතිය හිමි වූ බව කැබිනට් ප්‍රකාශක සෞඛ්‍ය හා දේශීය වෛද්‍ය අමාත්‍ය රාජිත සේනාරත්න මහතා පවසයි.

පසුගිය ජනපතිවරණ සමයේදී රූපවාහිනී සංස්ථාවට අවශ්‍ය නොවන යකඩ බට 600 ක් මිලදී ගෙන රජයට රුපියල් නව ලක්ෂ අනූදහසක පාඩුවක් කළ බවට චෝදනා කරමින් අල්ලස් කොමිසම හිටපු ජනමාධ්‍ය ඇමති කෙහෙළිය රඹුක්වැල්ල, රූපවාහිනී සංස්ථාවේ සභාපති හා අධ්‍යක්ෂ ජෙනරාල්වරයාට විරුද්ධව කොළඹ ප්‍රධාන මහේස්ත්‍රාත් ගිහාන් පිලපිටිය මහතා හමුවේ ඊයේ (22දා) නඩු පැවරීය.

හිටපු ආරක්ෂක ලේකම් ගෝඨාභය රාජපක්ෂ මහතා අද (23) උදෑසන අල්ලස් කොමිසම හමුවට පැමිණියේය. කොමිසම වෙත ගිය ගෝඨාභය රාජපක්ෂ මහතා ප‍්‍රකාශයක් ලබාදීම සඳහා වෙනත් දිනයක් ලබාදෙන ලෙස ඉල්ලීමක් කර ඇති බව වාර්තාවේ.

ඊයේ අත්අඩංගුවට ගෙන රක්ෂිත බන්ධනාගාරගත කෙරුණු හිටපු අමාත්‍ය බැසිල් රාජපක්ෂ මහතා බන්ධනාගාර රෝහලට ඇතුළත් කර තිබේ.

මාස කිහිපයක් තිස්සේ දූෂිතයන් වංචාකරුවන්, අපරාධකරුවන් සම්බන්ධයෙන් ලැබී තිබු පැමිණිළි විභාග කරමින් මේ වන විට ඔවුන් නීතිය හමුවට ගෙන ඒම සඳහා වත්මන් පාලනය විසින් ගෙන යන මෙහෙය ජනතා ප්‍රසාදයට හේතු වී තිබෙන බව මේ සම්බන්ධයෙන් කළ සමීක්ෂණ වාර්තාවකින් පෙන්වා දෙයි. විශේෂයෙන් තරුණ පරපුරේ දේශපාලන මතය ප්‍රකාශයට පත් කෙරෙන ෆේස්බුක් ට්වීටර් වැනි සමාජ ජාලාවල පල වූ මත සම්බන්ධයෙන් කළේ සමීක්ෂණයකදී සාතිශය බහුතරය (සියයට 75 ක පමණ දෙනා) නීතිය ක්‍රියාත්මක කරවීම ගැන අගය කර ඇත.

මෙරට පාර්ලිමේන්තු මැතිවරණ ක්‍රමය සංශෝධනය කිරීමට ශ්‍රී ලංකා නිදහස් පක්ෂයෙන් යෝජනාවූ ආණ්ඩු ක්‍රම ව්‍යවස්ථාවේ 20 වැනි සංශෝධනය ඊයේ (22දා) කැබිනට් මණ්ඩලයට ඉදිරිපත් කෙරුණු අතර, එය ප්‍රතිපත්තියක් ලෙස කැබිනට් මණ්ඩලය විසින් අනුමත කර ඇති බව වාර්තා වෙයි.

'රටේ ප්‍රජාතන්ත්‍රවාදයට එරෙහිව ඇති ප්‍රධාන තර්ජනය යටපත් නොකළහොත්, රටටත් ජනතාවටත් විජයග්‍රහණ ළඟා කරදෙන පාලනයක් කරා ගමන් කිරීමට ඔබට නොහැකි වනු ඇතැයි' අවධාරණය කරමින් වත්මන් ආණ්ඩුව බලයට පත්වී දින 10කදී තමා ජනාධිපති මෛත්‍රිපාල සිරිසේන මහතාට ලිපියක් භාරදුන් බව ජනතා විමුක්ති පෙරමුණෙන් ඉවත් වූ එම පක්ෂයේ හිටපු නායක සෝමවංශ අමරසිංහ මහතා ඊයේ (22දා) හෙළි කෙළේය.