වත්මන් ආණ්ඩුවට එරෙහිව රට පුරා සිදු කරන උද්ඝෝෂණ හා පෙළපාළි හේතුවෙන් සංචාරක පැමිණීම ශීඝ්‍රයෙන් පහත වැටීම නිසා මෙසේ ආදායම අහිමි වී ඇති බව ශ්‍රී ලංකා සංචාරක සංවර්ධන අධිකාරියේ අධ්‍යක්ෂ ජනරාල් ධම්මිකා විජේසිංහ මහත්මිය පවසා තිබෙනවා.
දළ වශයෙන් එක් දිනක දී සංචාරකයන් 3,800ක් පමණ ශ්‍රී ලංකාවට පැමිණි නමුත් රට පුරා පවතින උද්ඝෝෂණ හා පෙළපාලි හේතුවෙන් අද වන විට දෛනික සංචාරක පැමිණීම ආසන්න වශයෙන් 2,800ක් දක්වා ශීඝ්‍රයෙන් පහත වැටී ඇත.
ඒ අනුව සංචාරකයකු මෙරටට පැමිණි පසුව ආසන්න වශයෙන් අමෙරිකන් ඩොලර් 175ක පමණ මුදලක් දිනකට රටට හිමි වන බවද සංචාරක පැමිණීම අඩාළ වීම තුළ දිනකට රටට අහිමි වන ආදායම රුපියල් ලක්ෂ 542.5 ක් (ඇමෙරිකන් ඩොලර් 175,000) බවට ගණනය කර ඇත. මේ තත්ත්වය ශ්‍රී ලංකාවේ සංචාරක කර්මාන්තයට දැඩි බලපෑමක් එල්ල කරන්නකි.
මේ අතර ලංකාවේ පවතින තත්වය තුළ ඉන්දියාව ඇතුළු රටවල් රැසකින් විශාල වශයෙන් සංචාරක පැමිණීම් අවලංගු කර තිබෙ. ඒ තත්ත්වය තුළ සංචාරක පැමිණීම විශාල වශයෙන් පහත වැටෙන අතර කොවිඩ් 19 වසංගතයෙන් පසුව අඩාල වූ සංචාරක කර්මාන්තය ක්‍රමයෙන් යථා තත්ත්වයට පත්වෙමින් පැවැති මොහොතක මේ කඩාවැටීම අතිශය ඛේදාන්තයකි. මේ වර්ෂය අවසන් වනවිට විදෙස් සංචාරකයන් ලක්ෂ 23ක් පමණ මෙරටට පැමිණෙනු ඇතැයි සංචාරක අමාත්‍යංශය ගණනය කළ ඇත. එවැනි සංචාරකයන් පිරිසක් ශ්‍රී ලංකාවට පැමිණියේ නම් අමෙරිකානු ඩොලර් බිලියන 2.3ක පමණ ආදායමක් උපයා ගැනීමට හැකියාව තිබුණු බවත් සංචාරක අමාත්‍යංශය සදහන් කරයි.
කොවිඩ් වසංගතයෙන් වසර දෙකකට පසු මෙරට මාසික සංචාරක පැමිණීම ලක්ෂය ඉක්මවා ගිය අතර ඒ අනුව පසුගිය මාර්තු මාසයේ දී පමණක් විදෙස් සංචාරකයන් 106,500ක් පමණ ශ්‍රී ලංකාවට පැමිණියා .මේ වසරේ ජනවාරි 01 දා සිට මාර්තු මාසයේ අවසානය දක්වා මෙරටට සංචාරකයන් 280,026 දෙනකු පැමිණ තිබෙන අතර පසුගිය ජනවාරි මාසයේ දී මෙරටට පැමිණි සංචාරකයන් සංඛ්‍යාව 82,327 කි. පසුගිය පෙබරවාරි මාසයේ දී සංචාරකයන් 96,507ක සහ පසුගිය වසරේ (2021) මෙරටට පැමිණි සංචාරකයන් සංඛ්‍යාව 194,495 කි.
ඕනෑම රටක ජන අරගලයක් තම උපන් දේශය විනාශ කිරීමට නුපන් අරගලයක් විය යුතුය..යම් හෙයකින් එය රටට මෙලෙස කොඩිවිනයක් වන අරගලයක් නම් පුරවැසියන් ලෙස කල්පනා කළ යුත්තේ මේ අරගලය ඔබ අරන් යන්නේ කොයිබටද කියාය..මේ අසීරු කාලයේදී පටු දේශපාලන පක්ෂ වල ඉත්තන් බවට පත් නොවී මව් බිම නැවත ගොඩ නගන්නට ඔබේ දායකත්වය රටට ලබා දෙන්න..ඒ තුළින් පමණක් ඔබේ ඉල්ලීම් ඔබට ඉටු කරගත හැකි වනු ඇත.
-පංචාලි
