එම ගිවිසුමට ඊයේ (27) දින බත්තරමුල්ල නාගරික සංවර්ධන අධිකාරියේ ශ්‍රවණාගාරයේදී අමාත්‍ය ප්‍රසන්න රණතුංග අත්සන් තැබූ අතර, චීන රජය වෙනුවෙන් ඊට අත්සන් තැබුවේ ශ්‍රී ලංකාවේ චීන තානාපති චී ෂෙන්හොන් යන අයයි.
වසර තුනක් තුළ ඉදි කිරීම් අවසන් කිරීමට නියමිත අතර නිවාස 1,888 ක් කොළඹ ජීවත්වන අඩු ආදායම්ලාභීන්ටත්, නිවාස 108ක් මෙරට කෘතහස්ත කලාකරුවන් හා මාධ්‍යවේදීන් සඳහාත් වෙන්කෙරෙන බවද සඳහන් වේ.
එහිදී,
පෑලියගොඩ දුටුගැමුණු පාර නිවාස 615ක්,
දෙමටගොඩ එළුමඩුව වත්ත නිවාස 586 ක්,
මොරටුව බැටරි වත්ත නිවාස 575 ක්,
මහරගම අඹවත්ත නිවාස 112 ක්
කොට්ටාව පළතුරුවත්ත නිවාස 108ක් වශයෙන් ඉදි කෙරෙන බව සඳහන් වේ.
මෙහි දී කලාකරුවන් සහ මාධ්‍යවේදීන් සදහා වෙන් කරන්නේ කොට්ටාව පළතුරුවත්ත නිවාස 108 බවද සඳහන් වේ.
චීන රජය විසින් මෙම ව්‍යාපෘතිය සඳහා යුවාන් මිලියන 552ක මූල්‍යාධාරයක් ලබා දෙන අතර එය ආසන්න වශයෙන් ශ්‍රී ලංකා මුදලින් රුපියල් බිලියන 24.48ක් බව වාර්තාවේ.
එමෙන්ම අවබෝධතා ගිවිසුමට අත්සන් තැබීමෙන් පසු නාගරික සංවර්ධන හා නිවාස ඇමැති ප්‍රසන්න රණතුංග සඳහන් කළේ ලබන මාර්තු මාසයේදී මේ නිවාස ඉදිකිරීම් කටයුතු ආරම්භ කිරීමට අපේක්ෂා කරන බවයි.
මෙරට නිවාස ඉදිකිරීමට චීන රජය සමඟ ගිවිසුම් ගතවූ පළමු හා අවසන් අවස්ථාව මෙය නොවන බව පෙන්වා දුන් ඇමැතිවරයා චීනය හැමවිටම මෙරට ජනතාවගේ සමාජීය හා ආර්ථික ගැටලු සඳහා සහන සැලසීමට ඉදිරිපත් වූ බවද පෙන්වා දුන්නේය.
ජනාධිපති රනිල් වික්‍රමසිංහ ප්‍රමුඛ රජය වෙනුවෙන්, චීන ජනාධිපතිවරයා ප්‍රමුඛ රජයටත් එරට ජනතාවටත් ස්තූතිය පළ කළ ඇමැතිවරයා චීනය හා ශ්‍රී ලංකාව අතර රාජ්‍යතාන්ත්‍රික සබඳතා පුළුල් කිරීමට මේ ව්‍යාපෘති ඉවහල් වන බවද පෙන්වා දුන්නේය. චීනය හැමවිටම ශ්‍රී ලංකාවේ මිතුරෙකි. ශ්‍රී ලංකාව මුහුණදුන් සෑම අසීරු අවස්ථාවකදීම චීන රජය සමීප මිතුරකු ලෙස ඒ සඳහා සහාය පළ කළ බවත්, දශක තුනක් තිස්සේ මෙරට පැවැති යුදමය වාතාවරණය තුළත්, ඉන් පසුවත් චීනය හැමවිටම ශ්‍රී ලංකාව වෙනුවෙන් පෙනී සිටි බවද ඔහු පැවසීය.
