කොළඹ මහාධිකරණය විසින් නිකුත් කළ නොතීසියක් මත ඊයේ (15) එසේ අධිකරණය හමුවේ පෙනී සිටි විත්තිකාර කුලසිරි උඩුගම්පළ මහතා මහනුවර මහාධිකරණය මඟින් නියම කළ පෙර ඇප මත මුදා හැරීමට කොළඹ මහාධිකරණ විනිසුරු දේවිකා ද ලිවේරා තෙන්නකෝන් මහත්මිය නියෝග කළාය. විත්තිකරුට එරෙහිව මහනුවර මහාධිකරණය හමුවේ පවරා තිබූ මේ නඩුව නීතිපතිවරයා සතු ස්විෂේෂී බලතල මත කොළඹ මහාධිකරණය වෙත මාරු කිරීමෙන් පසු විත්තිකරුට කොළඹ මහාධිකරණය හමුවේ පෙනීසිටින ලෙසට එසේ නොතීසි නිකුත් කර තිබුණි.

විත්තිකරුට එරෙහි නඩුව විභාගයට ගැනීම සඳහා නඩුවේ 1 සිට 5 දක්වා හා 10, 11, 69, 71 හා 73 යන සාක්කිකරුවන්හට සිතාසි නිකුත් කරන ලෙස මෙම නඩුව ඊයේ (15) කැඳවූ අවස්ථාවේ නීතිපතිවරයා වෙනුවෙන් පෙනී සිටි රජයේ ජ්‍යෙෂ්ඨ අධිනීතිඥ ශහිල් කුලරත්න මහතා ඉල්ලා සිටියේය. ඒ අනුව එම සාක්කිකරුවන්හට සිතාසි නිකුත් කිරීමට නි‍යෝග කළ නීතිඥවරිය නඩුව නැවත කැඳවීම ලබන මස 13 වැනිදාට කල් තබන ලදී.

2002 /01/02 හා 2002/9/01 අතර කාලයේ දී අතුරුගිරියේ දී, කොළඹ දී, මහනුවර දී හා කටුගස්තොට දී ශ්‍රී ලංකා ජනරජයේ ස්වෛරීභාවය හා භෞමික අඛණ්ඩතාව රැක ගැනීමේ කාර්යේ යෙදී සිටි යුද හමුදා නිලධාරීන් සඳහා වූ මිලේනියම් සිටි නිවාස සංකීර්ණයේ පිහිටි ශ්‍රී ලංකා යුද හමුදාවට අයත් ආරක්ෂක නිවාස, හමුදා නිලධාරීන්, ඔවුන්ගේ මෙහෙයුම් හා එම මෙහෙයුම් සඳහා භාවිතා කළ යුද උපකරණ පිළිබඳවත් නිල රහස් ලබා ගැනීමෙන් එම ආරක්ෂක නිවාස වැටලීම, රාජකාරි ලිපි ගොනු භාරයට ගැනීම ඇතුළු අධි චෝදනා මත විත්තිකරුට එරෙහිව නීතිපතිවරයා විසින් මේ නඩුව පවරා ඇත.

එසේ තම භාරයට ගත් දේ සාලයට ගෙනවිත් ප්‍රදර්ශනය කිරීමට නියෝග කිරීම, ඒවා පිළිබඳ ලේඛන සකසන ලෙස මේජර් ක්ලිෆර් සොයිසාට උපදෙස් දුන් බවට හා භාරයට ගත් දේ කුරුදුවත්ත පොලිසියට රැගෙන විත් ප්‍රදර්ශනය කිරීම ඡායාරූප ගැනීම හා වීඩියෝ කළ බවටද විත්තිකරුට එරෙහිව වැඩිදුරටත් අධි චෝදනා නගා ඇත. තවද අත්අඩංගුවට ගත් යුද හමුදා නිලධාරීන් 2002/01/03 සිට 2002/01/13 යන කාලය තුළ ඔවුන් සිර කර තබාගත් බවටද නීතිපතිවරයා විත්තිකරුට එරෙහිව අධි චෝදනා නගා ඇත.

dinamina